Аҕатын сылгыларын ырытан, дакылаат оҥордо

Бу сыл тохсунньу ый 10-11 күннэригэр “Инникигэ хардыы” өрөспүүбүлүкэтээҕи НПК-ҕа биһиги оскуолаттан 7 кылаас үөрэнээччитэ Очиржапова Санаайа (салайааччы Очиржапов О.Б), 5 кылаас үөрэнээччитэ Маркова Айыына (Прокопьева С.И.) ситиһиилээхтик кыттан кэллибит.

Айыына “Сылгы өҥүн-дьүһүнүн уонна сааһын наардааһын” диэн тиэмэнэн кытынна. Манна кини аҕатын Марков С.П. сылгыларын ырытан, ааҕан-суоттаан дакылаат оҥорбута.  Сылгыга сыһыаннаах эбит диэн биһигини тыа хаһаайыстыбатын сиэксийэтигэр укпуттара. Бастаан улуус күрэҕэр лауреат аатын ыламмыт үөрбүппүт. Онтон салгыы куоракка чулууттан- чулуу оҕолору кытта күрэхтэстэ. Уопсайынан, бу кэмпириэнсийэҕэ тыһыынчаттан тахса оҕо, араас хайысхаларга кыттыыны ыллылар. Бастакы күн киэҥ- куоҥ “Триумф” уораҕайыгар стендэнэн көмүскээһин буолла. Долгуйуу кытаанаҕа этэ, көрдөххө дакылааттар барыта нууччалыы тылынан этилэр. Ол да буоллар, тургутууну ааһаммыт, иккис күҥҥэ кыттар чиэскэ тиксибиппит. 27 дакылаат иһилиннэ. Эппиппит курдук, биһиэнэ эрэ төрөөбүт тылбытынан  кэпсэннэ. Аны туран “юниор” эҥин диэн араарбакка барыларын тэҥҥэ истэллэр уонна сыаналыыллар эбит. Ол да буоллар, туох баар кыахпытынан, чаҕыйбакка киирсии буолла. Манна Айыына аан бастаан маннык киэҥ далааһыннаах күрэххэ  бэйэтигэр эрэлин олох түһэрбэккэ, түмүллэн, мөлтөөн- ахсаан биэрбэккэ кыттыбытыгар улаханнык махтанабын. Ити кини эппиэтинэстээҕин, оскуолатын, дьонун аатын түһэн биэрбэт санаатын өссө төгүл бигэргэттэ. Уон алтыс нүөмэринэн тахсан чобуотук кэпсээн сырдатта. Дьүүллүүр сүбэ эрэдьиэстээх соҕус ыйытыктарыгар астыннарар гына хоруйдаан, 1 миэстэлээх дипломунан наҕараадаланна. Очиржапова Санаайа » “Спорт уонна ЗОЖ» диэн сиэксийэҕэ үһүс миэстэ буолан, үөрүүбүт өссө улаатта, өрөгөйбүт үрдээтэ!

Үөрэнээччибэр Айыынаҕа, кини төрөппүттэригэр, оскуолам салалтатыгар  — Гоголев Н.И. Ефремова Л.П., Жигалова В. В.уонна күүс- көмө буолбут, үөрүүбүтүн тэҥҥэ үллэстибит биир идэлээхтэрбэр! Сырдык санаалара саппаҕырбатын, дьоллоох- соргулаах буоллуннар!

Прокопьева С И., П.С.Скрябин аатынан 1 Дьөппөн орто оскуолатын саха тылын уонна литэрэтиирэтин учуутала.