АГИКИ «Уһук Илиҥҥэ оҥоһулунна» пуорум сиэссийэтигэр партнер быһыытынан кытынна

Арктическайдааҕы култуура уонна ускуустуба института Хабаровскайга  «Уһук Илиҥҥэ оҥоһулунна» креативнай индустрия пуорумугар «Производственнай ситимнэр: үөрэхтээһинтэн ырыынакка тахсыы» сиэссийэтигэр партнер  быһыытынан кытынна. ВУЗ ректора эспиэр быһыытынан “Билим – Үөрэхтээһин – Индустрия” ситиминэн институт үлэтин туһунан кэпсээтэ, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.  

“АГИКИ билим, үөрэхтээһин уонна индустрия ситимнэрин туһанан үлэлиир. Билим чинчийиилэрэ саҥа үөрэх бырагыраамаларын оҥорон таһаарыыга төрүт буолаллар. Бу бырагыраамалар креативнай индустрия көрдөбүлүгэр эппиэттиир исписэлиистэри иитэн таһаарыыга туһалаахтар. Индустрияҕа үлэлиир дьону кытта ыкса сибээстээх үлэлэһэрбит, дьиҥ экэниэмикэҕэ чугас бырагыраамалары оҥорорбутугар көмөлөөх”, — диэтэ Саргылана Игнатьева.

АГИКИ үһүс сылын уһук илиннээҕи «Приоритет-2030»  трек бырагырааматын олоххо киллэриигэ үлэлэһэр. Эрэгийиэн социальнай-экономическай сайдыытыгар үрдүк хаачыстыбалаах үөрэхтээһини хааччыйар.

ВУЗка улахан өйөбүлү Ил Дархан Айсен Николаев, РФ Билимин уонна үөрэхтээһинин министиэристибэтэ, РФ Уһук Илин, Арктиканы сайыннарар министиэристибэтэ оҥороллор.

“Приоритет-2030“ бырагыраамаҕа кыттыыбыт, институт бэйэтин үөрэтэр парадигматын уонна бириинсиптэрин көрүнэн, култуура, ускуустуба классическай үрдүк үөрэҕин кыһатыттан креативнай индустрия университетыгар көһөрүгэр көмөлөһөр” – диэн эбэн эттэ ректор.