Аграрийдар Саха сиригэр 27 тыһыынчаттан тахса туонна үүтү туттардылар

Саха сиригэр от ыйын 18 күнүнээҕи туругунан 27 792,62 туонна үүт соҕотуопкаланна, ити бу сыллааҕы былаан 50,6 %-гар тэҥнэһэр.

Ааспыт сыл дааннайын кытта тэҥнээтэххэ, 23,5%-нан элбэх үүт соҕотуопкаланна. Бу туһунан СӨ Ил Дарханын уонна Бырабыыталыстыбатын пресс-сулууспата суруйар. Дьокуускайга уонна өрөспүүбүлүкэ 20 улуустарынан үүтү тутааһын барыта 44 тэрилтэҕэ оҥоһуллар. Муниципальнай тэриллиилэринэн сыллааҕы субвенция кээмэйин 68 %- на, ол эбэтэр 2430,217 мөл. солк.  үп-харчы ыытылынна. Онуоха Нам уонна Өлүөхүмэ улуустара 80%нын ыллылар. Үүт туттарааччыларга субсидия үбэ-харчыта толору кээмэйинэн тиэрдилиннэ.

Манна даҕатан эттэххэ, Ил Дархан Айсен Николаев сорудаҕынан быйыл 1 лиитирэ үүт субсидията 60-тан 65 солк. диэри үрдээбитэ. Ол курдук, субсидия кээмэйэ үрдээтин үүтү атыылаһыы сыаната 80 солк. тэҥнэстэ, мантан 15 солк. харчыны пиэрмэрдэргэ үүт соҕотуопкалыыр тэрилтэ ыытар.

2024 сылга үүтү соҕотуопкалааһын былаана 54924 туоннаҕа тэҥнэһэр.