Агро-оскуолалар өрөспүүбүлүкэтээҕи сэминээрдэригэр агротехнологическай үөрэхтээһин сайдыытын кэскилин ырытыстылар

Бу күннэргэ Томпо улууһун Е.П.Неймохов аатынан Мэҥэ Алдан орто оскуолатыгар “СӨ агротехнологическай үөрэхтээһини сайыннарыы уонна агро-кылаастары тэрийии кэскилэ” өрөспүүбүлүкэтээҕи агро-оскуолалар сэминээрдэрэ буолан ааста.

Тустаах оскуоланы талбыттара мээнэҕэ буолбатах. Оскуола төрүт хаһаайыстыбаны чөл хаалларыы, үөрэнээччилэри эргиччи сайыннарыы, үлэнэн иитии бырагырааматын үлэлэтиигэ биир бастыҥынан буолар. Сэминээргэ Амма, Мэҥэ Хаҥалас, Чурапчы, Сунтаар, Таатта, Томпо, Уус Маайа улуустарын уонна “Дьокуускай куорат” куораттааҕы уокурук агро-оскуолалара кытыннылар.

“АПК каадырдара” федеральнай бырайыак иитинэн агротехнологическай кылаастары тэрийии туһунан Арктикатааҕы судаарыстыбаннай агротехнологическай университет үөрэтэр-мэтэдиичэскэй управлениетын начаалынньыгын солбуйааччы Филимонова Марфа Николаевна, агро-оскуолаларга идэ эбии үөрэхтээһинигэр институт үлэтин туһунан институт дириэктэрэ Скрябина Нюргуйана Михайловна, АГАТУ бырайыактыыр офиһын үлэтин туһунан салайааччы Матаннанова Мотрена Васильевна кэпсээтилэр.

П.И.Кочнев аатынан Тулагы орто оскуолатын дириэктэрин солбуйааччы Петров Михаил Михайлович ТХПК оскуолаҕа суолтатын туһунан кэпсээтэ, агро-оскуолаларга ТХПК тэрийии туһунан туһалаах сүбэлэри биэрдэ. Оскуолаларга агротехнологическай үөрэхтээһин ис хоһоонунан Томпо улууһун Кириэс Халдьаайы орто оскуолатын дириэктэрин солбуйааччы Бысыина Мотрена Егоровна, Е.П.Неймохов аатынан Мэҥэ Алдан орто оскуолатын дириэктэрин солбуйааччы Кривошапкина Моника Егоровна, Уус Маайа улууһун Петропавловскай орто оскуолатын дириэктэрэ Винокурова Альбина Михайловна тыл эттилэр.

Кыттааччылар оскуола кыһыҥҥы тэпилииссэтигэр сырыттылар, оҕуруот аһын арассаадатыгар туһаныллар туорпаттан иһит оҥоруутун көрдөрдүлэр, ону тэҥэ, сэминээр кыттыылаахтара мандарин маһыгар болҕомтолорун уурдулар.

Сэминээр үөрүүлээх аһыллыытыгар үбүлүөйүнэн сибээстээн, өр сылларга Е.П.Неймохов аатынан Мэҥэ Алдан оскуолатыгар дириэктэринэн үлэлээбит РФ үтүөлээх учуутала, СӨ үөрэҕириитин үтүөлээх үлэһитэ Николаев Александр Степановиһы чиэстээтилэр.

Сэминээр кыттыылаахтара үөрэнээччилэр үлэҕэ биригээдэлэрэ өссө 1957 сыллаахха тэриллибит, аныгы ырыынак экэниэмикэтин усулуобуйатыгар олоххо бэлэмнээх, үлэ араас көрүҥэр сөп түбэһэр сатабыллаах оҕолору иитэн таһаарар Мэҥэ Алдан оскуолатыттан теорияҕа уонна быраактыкаҕа улахан уопуту иҥэриннилэр. Бу туһунан Үөрэх уонна билим министиэристибэтин саайтыгар сырдаталлар. Сиһилии манна ааҕыҥ.