Агроном сүбэтэ: Өрөбүллэри туһалаахтык атаарабыт

Оҕурсуу үүннэриитин кистэлэҥнэрин бары да кэриэтэ билэн, уустук дьыала буолбатах диэн ааҕаллар. Ол эрээри, дьиҥ-чахчытыгар, өлгөм астаах үүнүүнү ыларга агрономнар сүбэлэригэр сигэнэбит. Бүгүн хас биирдии оҕуруот аһын үүнээйитин уратыларын учуоттаан, идэлээх агрономнар сүбэлэрин таһаарабыт.

Саха сирин уларыйа турар килиимэтигэр агрономнар анал суортаах оҕурсуу олордор наадалааҕынан ааҕаллар. Онон агрономнар арассаада атыылаһарга Саха сирин килиимэтин усулуобуйатыгар барсар суортары таларга сүбэлииллэр. Холобур, Сибиир уонна Уһук Илин эрэгийиэннэригэр тэпилииссэҕэ ордук «Муравей», «Маринда», «Буян», «Мурашко», «Твикси», «Бидретта», «Халли», «Бабушкин секрет», «Клавдия» уонна «Мэлс» оҕурсуу суортара барсаллар. Бу оҕурсуу суортара ханнык баҕарар дьылга өлгүмнүк үүнэллэр. Итини кытта Саха сиригэр оҕуруоччуттар «Стелла», «ТСХА» уонна «Китайскай» суортары сөбүлээн олордоллоро биллэр – астара уһун уонна хатыыта суох буолар.

Оттон аһаҕас халлаан анныгар, хортуоппуй ыһар буоругар, «Г1 Таник», «F1 Кураж», «F1 Ежик» «Алтайские ранние», «Муромские» уонна «Конкурент» оҕурсуу суортарын олордуохха сөп. Бу култууралар буоһатыыга наадыйбаттар уонна аһылыгын олордуллубутун 30 хонук кэнниттэн биэрэллэр.

Өрөбүл күннэргэ агрономнар оҕурсуу арассаадатын тэпилииссэҕэ олордору таһынан, «Грибовские 37», «Зебра» уонна «Белоплодные» кабачки суортарын сиэмэтин ыһар наадалааҕынан этэллэр.

Тэпилииссэҕэ олордуллубут оҕурсуу буоругар бастакы күннэргэ ууну элбэҕи куппаккытыгар сүбэлэнэр,  ол оннугар сэбирдэхтэригэр уу ыһар наадалааҕынан ааҕаллар. Оттон аһатыыга кэнчээри оту 7-10 күн бакыат иһигэр хатаран баран, ууга суурайан, биирдии лиитэрэнэн биир укка кутуллуохтаах. Маны сэргэ сымыыт хаҕынан эбии аһатыы диэн баар. Бу кальцийынан аһатыы диэн буолар. Оҕурсуу үүнэр буоругар кальций тиийбэт буоллаҕына, укка тахсыбыт астар ситэ улааппаттар, хатан, өлөн иһэллэр уонна оҕурсу сэбирдэхтэрэ аллараа диэки намылыйан үүнэр буолаллар. Оннук түбэлтэҕэ 7, 8 устуука сымыыт хаҕын хас да күн хатарабыт уонна бытарытабыт.  Ону биэдэрэ аҥаара ууга суурайабыт уонна укка барытыгар үллэрэн кутабыт.