«Агростартап»: Грант көрүллүүтүгэр докумуону тутуу саҕаланна

Тыа хаһаайыстыбатын уонна ас-үөл бэлиитикэтин министиэристибэтэ грант көрүллүүтүгэр “Агросартапка” атырдьах ыйын 12 күнүттэн докумуону тутан саҕалаата. Быйыл 64 мөл. солк. тахса үп-харчы көрүллүбүт, итинтэн 60 мөл. солк. – федеральнай хааһынаттан.

Күөн күрэскэ бааһынай (фермерскэй) хаһаайыстыбалар эбэтэр тыа хаһаайыстыбатын оҥорон таһаарыыга сүрүн дьарыктаах бааһынай хаһаайыстыбатын баһылыгынан буолар урбаанньыттар кытталлар.

Тыа хаһаайыстыбатын министиэристибэтигэр быһаарбыттарынан, кыайыылаахтар хаһаайыстыбаны сайыннарыы хайысхатыттан тутулуктанан 1,5-тан 8 мөл. солк. диэри ылыахтара, маныаха бэйэлэригэр бырайыак 10% кырата суох суумалаах буолуохтаахтар.

Грант харчытын сүөһү, тиэхиньикэ, тыа хаһаайыстыбатын оҥорон таһаарыытыгар туһаныллар тэрили, сир, оҥорон таһаарар эбийиэктэри ыларга, инженернэй ситимҥэ холбуурга уо.д.а. туһаныахха сөп.

Докумуону 2025 сыл атырдьах ыйын 12 күнүттэн балаҕан ыйын 11 күнүгэр диэри “Электроннай бюджет” систиэмэнэн электроннай көрүҥүнэн туталлар.

Хамыыһыйа сайаапкалары көрөр болдьоҕо: 2025 сыл балаҕан ыйын 22-27 күннэрэ. Кыайыылаахтары бу сыл балаҕан ыйын 27 күнүгэр диэри биллэриэхтэрэ.

Сиһилии манна ааҕыҥ: https://minsel.sakha.gov.ru/news/9737.