Аҕыс саастаах оҕо инсуллаабыт

Ямало-Ненецкэй Автономнай уокурукка хирурдар оскуолаҕа инсуллаабыт аҕыс саастаах кыыһы быыһаабыттар. Ити туһунан тустаах уокурук Доруобуйатын харыстабылын департаменыгар сигэнэн, URA.RU сайт суруйар.

“Кыыһы санитарнай авиациянан илдьибиттэрэ.  Уҥа өртө үлэлээбэт, сатаан саҥарбат эбит. Эпэрээссийэ уустук, 1 чаас 20 мүн. устата барда. Инсуллаабыт оҕону аан бастакытын эпэрээссиэйэлээтибит, ол эрээри, этэҥҥэ ааста”, – диэн департамент пресс-сулууспата иһитиннэрбит.

Эпэрээссийэ кэнниттэн кыыс реаниматологтар кэтээн көрүүлэригэр сылдьыбыт, салгыы доруобуйатын чөлүгэр түһэриини ааспыт. Дьолго, кыыһы икки нэдиэлэнэн балыыһаттан таһаарбыттар, ким да көмөтө суох бэйэтэ хаамар, саҥарар, туруга үчүгэй буолбут. Күн бүгүн кыыс доруобуйатын Ямал оройуонун быраастара көрөллөр-истэллэр.