Аҕыс улууска уопсайа 1,6 туонна көлөппүнэ булуллан уматылынна

Өрөспүүбүлүкэҕэ «Мак-2025» биэдэмистибэлэр икки ардыларынааҕы суһал-сэрэтэр тэрээһин бастакы түһүмэҕэ ыытылынна. Онно өрөспүүбүлүкэ быраабы араҥаччылыыр структураларын үлэһиттэрэ, ону таһынан толорор былаас уорганнара кыттыыны ыллылар.

Тэрээһин сүрүн соруктарынан сокуоннайа суох көлөппүнэ үүнэйи ыһыыларын уонна айылҕаҕа аһаҕастык үүнэр сирдэрин булан ылыы уонна эһии, ону сэргэ үүнээйиттэн оҥоһуллар наркотигы сокуоннайа суох атыылааһыҥҥа сыһыаннаах буруйу оҥорууну бохсуу буолар. Бырайыак бастакы түһүмэҕин түмүгүнэн,  ИДьМ сулууспатын эргиниини хонтуруоллуур управлениетын үлэһиттэрэ эрэгийиэн сиригэр-уотугар айылҕаҕа үүнэр 78 көлөппүнэ үүнээйини буллулар.

Көлөппүнэ үүнээйи Өлүөхүмэ, Мэҥэ Хаҥалас, Уус Алдан, Нам, Таатта, Чурапчы, Хаҥалас уонна Сунтаар улуустарыгар булуллубуттар. 8,9 гектар иэннээх сиргэ 1,6 туонна айылҕаҕа аһаҕастык үүнэр көлөппүнэ эһилиннэ.

Тэрээһин кэмигэр быраабы араҥаччылыыр уорганнарынан үүнээйиттэн оҥоһуллар наркотигы сокуоннайа суох эргиниигэ сыһыаннаах 9 буруйу оҥоруу тахсыбыта бэлиэтэннэ, ол иһигэр: РФ ХК 228.1 ыстатыйатынан – 8, РФ ХК 228 ыстатыйатынан – 1. 1210,834 гр. үүнээйиттэн оҥоһуллар наркотик (каннабис – 1210,619 гр., гашиш арыыта – 0,215 гр.) былдьанна. Үүнээйиттэн оҥоһуллар наркотигы сокуоннайа суох эргиниигэ сыһыаннаах 14 административнай боротокуол оҥоһулунна, ол иһигэр РФ Административнай буруйу оҥоруу туһунан Кодексынан 6.8 ыстатыйатынан – 3, 6.9 ыстатыйатынан – 9, 10.5.1 ыстатыйатынан – 2. Бу туһунан Саха сиринээҕи ИДьМ сулууспатын Наркотигы эргиниини хонтуруоллуур управлениета иһитиннэрэр.