Наталья Барбахтырова: «Кирэдьиити аһары эрдэ төлүүр киһиэхэ биэримиэхтэрин сөп”

Соторутааҕыта биһиги бары сөбүлээн көрөр “Эйгэ” биэриибитигэр кирэдьиит туһунан кэпсэппиттэрэ. Ыытааччы Ольга Пухова ыйытыыларыгар адвокат Наталья Барбахтырова хоруйдаабыта.

Биэриитин саҕалыырыгар Ольга Пухова РФ нэһилиэнньэтин 15  % эрэ кирэдьиитэ суоҕун, биэстэн элбэх кирэдьииттээхтэр баалларын тоһоҕолоон бэлиэтээбитэ.

— Саҥа үйэ тэтиминэн кирэдьиитэ суох киһи диэн аҕыйах. Гражданскай Кодекска 819 ыстатыйа диэн баар. Онно кирэдьиит туһунан бүтүн глава баар. Кирэдьиит диэн баан эбэтэр кирэдьиит тэрилтэтэ заемщикка иэс харчы биэриитэ ааттанар. Ол хайаан да дуогабарга суруллуохтаах. Ол курдук, суумата, болдьоҕо, бырыһыаннара уонна ылбыт киһи ханнык усулуобуйаҕа төннөрүөхтээҕэ. Кирэдьиит дуогабара хайаан да суругунан буолуохтаах. Оннук оҥоһуллубатах дуогабар күүһэ суох буолар. Ону тэҥэ бааннар үксүгэр дуогабары бытархай гына суруйбут буолаллар. Ол бытархай гына суруллубуту сүрэҕэлдьээбэккэ ааҕар ордук. Сороҕор кирэдьиити ылааччыга сөбө суох усулуобуйалар киирэн хаалаллар. Хаһыс күнүттэн төһө бырыһыан ааҕыллан барара эҥин барыта суруллар. Ону кирэдьиити ылаары олорон үчүгэйдик чопчулуохха, ыйыталаһыахха.

— Хас сааһыттан кирэдьиити биэрэллэрий?

— Сокуоннай сааһын туолбукка биэрэллэр. Ол эрээри   бааннар барыларыгар кирэдьиити биэрэр буолбатахтар. Аһары эрдэ төлүүр дьоҥҥо биэримиэхтэрин эмиэ сөп. Тоҕо диэтэххэ, кылгас болдьоххо баан төлөөччүттэн кыра бырыһыаны ылан хаалар, кинилэргэ барыһа суох буоларын иһин.

Хаартыска: ааптар