Ахсынньы 24 күнүгэр Ил Дархан Харыйата буолуоҕа

Оҕолор уонна улахан дьон тапталлаах бырааһынньыктара – Саҥа дьыл, Ороһооспо чугаһаатар чугаһаан иһэллэр. Кырачааннар, оскуола үөрэнээччилэрэ уһуйааннарыгар, оскуолаларыгар бырааһынньыктан, Саҥа дьыллааҕы көрдөрүүлэртэн, Харыйаттан, Тымныы Оҕонньортон маталлара хайдах даҕаны табыллыбат.

Номнуо бу нэдиэлэҕэ өрөспүүбүлүкэ үрдүкү кылааһын үөрэнээччилэригэр саамай чаҕылхай, аптаах тэрээһин – үгэскэ кубулуйбут Ил Дархан сыллата ыытар Харыйата буолуоҕа. Сыл бырааһынньыгар өрөспүүбүлүкэ бары улуустарыттан 700 саамай көхтөөх, кыһамньылаах оҕолор мустуохтара: туйгун үөрэнээччилэр, Бүтүн Арассыыйатааҕы олимпиадалар, билим-быраактыка кэмпириэнсийэлэрин кыайыылаахтара, бастыҥ спортсменнар.

Н.А.Соколова салайааччылаах Үөрэх уонна билим министиэристибэ аатыттан тэрийээччилэр кыттааччыларга анаан чаҕылхай бырагырааманы бэлэмнии сылдьаллар.

Ахсынньы 23 күнүгэр, субуотаҕа Ф.И.Авдеева аатынан Оҕо айымньытын дыбарыаһыгар “Биһиги Арассыыйа кэскилэбит” оҕолор гражданскай пуорумнара ыытыллыаҕа. Бу иитинэн кыттааччылар дойду социальнай-экэнэмиичэскэй сайдыытыгар бэйэлэрин кылааттарын киллэриэхтэрэ.

Онтон саамай кэтэһиилээх, остуоруйа курдук аптаах Саҥа дьыллааҕы көрдөрүү, бу сыл ахсынньы 24 күнүгэр Марфа уонна Сергей Расторгуевтар ааттарынан цииркэҕэ буолуоҕа. Үгэс быһыытынан өрөспүүбүлүкэ аҕа баһылыга Айсен Николаев лауреаттарга СӨ Ил Дарханын истипиэндьийэтин дьупулуомнарын туттарыаҕа.

Идэҕэ урутаан бэлэмниир киин педагогтара Ил Дархан Харыйатын кыттыылаахтарыгар анаан ураты маастар-кылаастары бэлэмнииллэр.

Күндү оҕолор, кэлэн иһэр Саҥа дьыл уонна Ороһооспо бырааһынньыктарынан истиҥник эҕэрдэлиибит! Өрөспүүбүлүкэ сүрүн Харыйата умнуллубат, өйдөнөн хаалар түгэнинэн буоллун, элбэх доҕоттору кытта билиһиннэрдин уонна Саҥа дьыллааҕы хатыламмат үөрүүнү бэлэхтээтин!

Үөрэх уонна билим министиэристибэтин пресс-сулууспата.