Ахсынньы 9 күнүгэр  Аҕа дойду Дьоруойдарын күнэ бэлиэтэнэр

Ахсынньы 9 күнүгэр Арассыыйа империятын, Сэбиэскэй Сойуус уонна аныгы Арассыыйа – араас кэмнэр дьоруойдарын бэлиэ быһыытынан ситимниир, байыаннай албан аат быстыбатын тоһоҕолоон көрдөрөр Аҕа дойду Дьоруойдарын күнэ бэлиэтэнэр.

Бу күн хорсун быһыыларын иһин Ийэ дойду үрдүкү судаарыстыбаннай наҕараадатыгар – Сэбиэскэй Сойуус Дьоруойун, Арассыыйа Федерациятын Дьоруойун ааттарыгар, Албан аат уонна Сибэтиэй Георгий уордьаннарыгар тиксибит көмүскээччилэр хорсун быһыыларын чиэстииллэр.

«Аҕа дойду Дьоруойдарын күнүгэр биһиги дойду уонна кини кэскилин туһугар уһулуччулаах быһыылары оҥорбут, бэйэлэрин үлэлэринэн, дьыалаларынан, бойобуой хорсун быһыыларынан Ийэ дойдуга уонна норуокка бэйэни харыстаммакка сулууспалааһын холобурун көрдөрбүт бары биир дойдулаахтарбытыгар ытыктабылбытын биллэрэбит», – диэн Арассыыйа Бэрэсидьиэнэ Владимир Путин бэлиэтээтэ.

Саха сиригэр Аҕа дойду Дьоруойдарын күнүгэр Аҕа дойду Улуу сэриитин сылларыгар үрдүк ааттарга тиксибит Сэбиэскэй Сойуус уонна Арассыыйа Федерациятын Дьоруойдарыгар – 25 саха сирин олохтооҕор махталлаах өйдөбүнньүк бэлиэтин уураллар. Ол ыар сылларга биэс Саха сирин олохтооҕо үс истиэпэннээх Албан аат уордьанын кавалердара буолбуттара. Өрөспүүбүлүкэҕэ бырааһынньык улахан сорҕотунан эйэлээх кэмҥэ оҥоһуллубут хорсун быһыылары билинии буолар. Ол курдук, Саха сирин ОМОН хамандыыра Александр Рыжиков 2000 сыллаахха Хотугу Кавказка контртеррористическай эпэрээссийэни ыытыыга хорсун быһыытын иһин өлбүтүн кэннэ Арассыыйа Федерациятын Дьоруойун аатыгар тиксибитэ.

2010 сыллаахха Арассыыйа Федерациятын Дьоруойдарын ааттара Саха сириттэн сылдьар пилоттар Евгений Новоселовка уонна Андрей Ламановка иҥэриллибиттэрэ. Лүөччүктэр идэтийбит уонна хорсун дьулуурдара авиалайнер иһигэр уонунан ахсааннаах дьон олоҕун быыһаабыта.

«Бүгүн анал байыаннай эпэрээссийэ ыытыллар сиригэр дьоруойдар сыдьааннара нацизм аныгы батыһааччыларын утары охсуһууну салгыыллар. Биһиги эйэлээх олохпут иһин кыргыһыылар кэмнэригэр кинилэр хорсуннарын, бойобуой доҕордоһууну көрдөрөллөр уонна сэбилэниилээх утарылаһыы саамай уустук усулуобуйаларыгар туруоруллубут соруктары сатабыллаахтык быһаараллар, кэлэр көлүөнэҕэ дьиҥнээх дьоруой уонна холобур буолаллар», – диэн СӨ Ил Дархана Айсен Николаев бэлиэтээтэ.

Бүтүн дойду Саха сириттэн төрүттээх Арассыыйа Дьоруойдарын хорсун быһыыларынан киэн туттар уонна сөҕөр-махтайар. Кэнники сылларга өрөспүүбүлүкэттэн  байыаннай дьайыы уон икки кыттыылааҕа Арассыыйа Дьоруойдара буоллулар. Кыргыһыы хонуутугар кинилэр аан дойдуга күүстээх санааларын, үрдүкү байыаннай идэлэрин, бирисээгэҕэ уонна Ийэ дойдуга бэриниилээхтэрин көрдөрдүлэр. Дмитрий Егоров уонна Петр Киприянов саарбахтаабакка Ийэ дойду көҥүлүн уонна тутулуга суох буолуутун иһин олохторун толук уурбуттара.

Ыччат дьыалаларыгар уонна социальнай коммуникацияларга министиэристибэтэ иһитиннэрбитинэн, сарсын, ахсынньы 9 күнүгэр, Ю.А. Гагарин аатынан култуура уонна аныгы ускуустуба киинигэр Аҕа дойду Дьоруойдарын күнүгэр анаммыт үөрүүлээх киэһэ буолуоҕа. Тэрээһин бырагырааматыгар: «Дьоруойу кытта кэпсэтии» аахсыйа; «Дьоруой биир дойдулаахтарбыт» уонна «Дьоруойдар кэргэттэрэ» хаартысканан быыстапкалар; «Тыыннаах өйдөбүнньүк» аахсыйа; байыаннай дьайыы бэтэрээнэ Вячеслав Козловскай «Аҕа дойдуну көмүскээччилэр» уонна «Олох уонна охсуһуу ускуустубата» быыстапкалара уонна улахан бырааһынньыктааҕы кэнсиэр. Үөрүүлээх киэһэ 16:30 чаастан саҕаланар. Тэрээһин биһиги Ийэ дойдубут иһин күүстэрин уонна олохторун толук уурбут дьоҥҥо өйдөбүнньүк уонна ытыктабыл бэлиэтэ буолуоҕа диэн Ыччат дьыалаларыгар уонна социальнай коммуникацияларга министиэристибэтигэр бэлиэтээтилэр.