Ахсынньыга 30-тан тахса субсидиялаах авиарейс былааннанна

Өрөспүүбүлүкэ быйылгы сыллааҕы бүддьүөтүгэр улуус иһинээҕи көтөр аалынан сырыылары субсидиялыырга эбии 24,4 мөл. солкуобай көрүлүннэ.

Бу туһунан СӨ Тырааныспарга министиэристибэтэ иһитиннэрэр. Субсидияламмыт чэпчэтиилээх көтүүлэргэ Аллайыаха, Анаабыр, Булуҥ, Кэбээйи, Аллараа Халыма, Өлүөхүмэ, Өлөөн, Орто Халыма уонна Усуйаана улуустарыгар үрдүк наадыйыы бэлиэтэнэр. Билиҥҥи кэмҥэ ити сырыылары толорор авиахампаанньалары сүүмэрдээһин бара турар. Сырыыларга сүүмэрдээһин түмүктэнэн, сөбүлэҥнэр илии баттаммыттарын кэннэ рейстэр саҕаланыахтара.

Холобур, Березовка – Орто Халыма маршрутунан субсидияламмыт билиэт сыаната 5 676 солкуобай буолуо, оттон Хара Уулаахтан Тиксиигэ – 5 405 солкуобай.