«Ахсынньытааҕы дьаарбаҥкаҕа» эт, балык сыаната намтыырын биллэрдилэр

Дьокуускайга бу өрөбүллэргэ Хомсомуол болуоссатыгар ыытыллар «Ахсынньытааҕы дьаарбаҥкаҕа»  балык уонна эт сыаната сэтинньи ыйтан намыһах буоларыгар эрэннэрдилэр.

Бу туһунан «Ахсынньытааҕы дьаарбаҥка» тэрийээччитэ Павел Чириков иһитиннэрдэ. «Ас көрүҥэ кыһыҥҥы суол аһыллыбытынан сибээстээн кэҥиэҕэ. Ону сэргэ өрүс уҥуор сытар улуустартан тыа хаһаайыстыбатын кэпэрэтииптэрэ кыттыахтара. Эти таһынан полуфабрикаттары, ынах арыытын күүтэбит, оттон балык чааһыгар быйыл бастакы муус анныгар тутуллубуту атыылыахпыт», — диэтэ кини. Тэрийээччилэр «Ахсынньытааҕы дьаарбаҥкаҕа» эт сыаната уруккутунааҕар намыһах буолуо диэн эрэннэрдилэр. Павел Чириков балык сыаната эмиэ түһүө диэн эбэн эттэ. Балык бастакы баартыйата дьаарбаҥкаҕа массыынанан аҕалыллан, сыана үрдээһинин сабыдыаллаабат диэтэ кини.

— Сэтинньи ыйга Хомсомуол болуоссатыгар ыытыллыбыт «Идэһэ» дьаарбаҥкаҕа 25 туоннаттан тахса эт атыыламмыта, — диэтэ Павел Чириков. Кэлэр дьаарбаҥкаҕа өссө элбэх бородууксуйаны батарар былааннаахтар.

Санатан эттэххэ, Дьокуускайга өссө биир дьаарбаҥка ахсынньы 20-22 күннэригэр  тэриллиэҕэ.