Аһымаҕа от кэллэ!

Бүгүн Горнай улууһун Аһыма сэлиэнньэтигэр оту тиэммит  түөрт массыына кэллэ. Ол курдук, Хаҥалас улууһун Уулаах Ааныттан  бу массыыналар 71 туонна оту аҕалбыттар. Ону 12 хаһаайыстыбаҕа түҥэттилэр.

— Хата, бэйэбит улууспут массыыналаах уолаттара сөбүгэр сыанаҕа сөбүлэһэн, тиэйэн аҕалан абыраатылар. Онон Дьулус Даниловка, Егор Заровняевка, Александр Николаевка, Альберт Ноговицыҥҥа махталбытын тиэрдэбит. Оппут күөх, чиҥ баҕайы диэн хаһаайыстыбаларбыт астыннылар, үөрдүлэр. Өйүүн эмиэ түөрт массыына кэлиэхтээх диэн кэтэһэбит, — диэтэ нэһилиэк тыа хаһаайыстыбатын исписэлииһэ Станислав Андреев.

Кировскайдар оту тиэйиини өрөспүүбүлүкэ Тыатын хаһаайыстыбатын уонна аска-үөлгэ бэлиитикэтин министиэристибэтэ субсидиялыыра буоллар диэн баҕа санаалаахтар. Онон от кэлэн, кыстык этэҥҥэ ааһарыгар эрэллээхтэр.