Аһымал тэрээһиннэртэн – байыаннайдарга көмө

Өлүөхүмэ куоратын «Гармония» култуура киинин дириэктэрэ Алена Колмыгина   байыаннай эпэрээссийэҕэ инники кирбиигэ сылдьар буойуттары өйүүр аһымал кэнсиэртэр, аахсыйалар  ыытыллан, онно киирбит үбүнэн байыаннай дьайыыга наадалаах техника, саппаас чаас уо.д.а. ылыллан, ыам ыйыгар муора пехотатын 3-с взводун, 3-с ротатын 155-с туспа гвардейскай биригээдэтигэр тиксэриллибитин туһунан Өлүөхүмэ куоратын дьаһалтатын телеграм-ханаалыгар иһитиннэрдэ.

— Эр дьон «Дуорай» вокальнай ансаамбылын биэс сыллаах үлэтин бэлиэтиир кэнсиэртэн, «Гармония» НКК хореографическай отделениетын, «Потеха» норуот фольклорун ансаамбылын отчуоттуур кэнсиэртэриттэн, «Исток» норуот театрын «Жди меня» испэктээги туруоруутуттан, улуус 10 муниципальнай тэриллиини хабан, «ZA Победу!» диэн “Вахта памяти” автопробегы ыытыыттан харчы киирбитэ. Онон чүмэчи, эрэһиинэ уо.д.а курдук, саппаас чаастардаах икки матасыыкыл, сэттэ Хайтер радиостанция, байыаннай медперсонал көрдөһүүтүнэн УАЗ массыынаҕа бадараантан хаххалыыр эрэһиинэлэр уо.д.а. ылыллан тиксэриллибиттэрэ.
Саас муус устар 21 күнүгэр «Гармония» култуура киинигэр куорат дьаһалтата, дьокутааттара, куорат уопсастыбаннай Сэбиэтин чилиэннэрэ уонна култуура киинин үлэһиттэрэ буоламмыт байыаннай дьайыыттан кэлэ сылдьар буойуттарбытын кытта көрсүбүппүт. Онно ити курдук аһымал тэрээһиннэри ыытан, буойуттарбытыгар тус сыаллаах көмөнү оҥорор туһунан быһаарыы ылыммыппыт. Ол быһыытынан аһымал кэнсиэртэр, испэктээктэр утумнаахтык ыытылыннылар. Түгэнинэн туһанан, байыаннай эпэрээссийэҕэ кыттар буойуттарбытыгар көмөлһүүгэ анаан ыыппыт аһымал тэрээһиннэрбитигэр кыттыбыт, көрөөччү буолан көмөлөрүн утары ууммут бары дьоммутугар улахан махталбытын этэбит.