Аһынан-үөлүнэн хааччыйар 37 эбийиэк спорстменнары көрсөргө бэлэм

Бүгүҥҥү күҥҥэ аһынан-үөлүнэн хааччыйар  37 эбийиэк «Азия оҕолоро» норуоттар икки ардыларынааҕы спортивнай оонньуулар кыттыылаахтарын көрсөргө бэлэм.

Бу туһунан Саха сирин Урбаан, атыы-эргиэн уонна туризм миниистирэ Тимур Ханды иһитиннэрдэ. Бүгүн «Азия оҕолоро» МСИ аккредитациялыыр эбийиэктэргэ сэртипикээт туттарылынна. Бары эбийиэктэринэн сөптөөх бэрэбиэркэ ыытылынна.

«Арассыыйа уонна аан дойду ирдэбиллэригэр сөп түбэһиннэрэн, киэҥ далааһыннаах тэрээһин кыттыылаахтарын уонна ыалдьыттарын көрсөргө бэлэмнэнэллэрэ улахан суолталаах. Аккредитацияламмыт эбийиэктэр барыта Санэпиднадзор ирдэбиллэригэр сөп түбэһиннэрэн наадалаах иһитиннэриилэри ылбыттара», – диэн миниистир иһитиннэрдэ.

Манна даҕатан эттэххэ, аһынан-үөлүнэн хааччыйар эбийиэктэр үлэһиттэригэр Роспотребнадзор управлениетын, ону тэҥэ Саха сирин гигиенатын уонна эпидемиологиятын киинэ кыттыылаах  сэминээр ыытыллыбыта.

РФ Бэрэсидьиэнэ Владимир Путин «Азия оҕолоро» оонньуулары оҕо спортивнай успуордун эйгэтигэр саамай кэрэхсэбиллээх уонна табыллыбыт бырайыагынан ааҕар.

Ил Дархан Айсен Николаев «VIII норуоттар икки ардыларынааҕы спортивнай оонньуулар норуоттар икки ардыларынааҕы биир бөдөҥ тэрээһининэн буолан, үрдүк таһымҥа ыытыллыаҕа» диэн бэлиэтээбитэ.