Аина Моисеева уонна Надежда Татарченко Арассыыйа Куубагар кыттыахтара

Саха сирин сүүмэрдэммит хамаандатын дзюдоисткалара Аина Моисеева уонна Надежда Татарченко Арассыыйа Куубагар киирсиэхтэрэ. Күрэхтэһии ахсынньы 5-7 күннэригэр Череповец куоракка ыытыллар. Бу туһунан «Триумф» пресс-сулууспата иһитиннэрэр.

Дьахталларга Арассыыйа чөмпүйэнээтин мэтээллэрин толору кэмпилиэгин хаһаайката Аина Моисеева 48 киилэҕэ диэри ыйааһыҥҥа тустуоҕа. Кини татамига ахсынньы 5 күнүгэр тахсара күүтүллэр. Оттон дойду үрүҥ көмүс призера Надежда Татарченко 70 киилэҕэ диэри ыйааһыҥҥа киирсиэҕэ. Күрэсчит мэтээллэр иһин ахсынньы 7 күнүгэр күүһүн холонуо.

Күрэхтэһии наҕараадатын пуондатынан, кыайыылаахтар 100 тыһыынча солкуобайынан наҕараадаланыахтара,  үрүҥ көмүс призердарга 75 тыһыынча солкуобайдаах сэртипикээт туттарыллыаҕа, оттон боруонса призердар 50 тыһыынча солкуобайдаах бирииһи ылыахтара.