Аина Моисеева Узбекистаҥҥа «Большой шлем» күрэхтэһиитигэр кыттыаҕа

Саха сирин сүүмэрдэммит хамаандатын дзюдоистката Аина Моисеева Ташкент куоракка ыытыллар «Большой шлем» күрэхтэһиигэ дойду сүүмэрдэммит хамаандатыгар ыҥырылынна. Кини 48 киилэҕэ диэри ыйааһыҥҥа дойдутун аатыттан кыттыаҕа диэн «Триумф» успуорт киинэ иһитиннэрэр.

Дьахталларга Арассыыйа чөмпүйэнээтин толору мэтээлин хаһаайката Аина Моисеева бу сылы «Большой шлем» турниртан саҕалыыр. Аан дойдутааҕы улахан күрэхтэһии олунньу 27 күнүттэн кулун тутар 1 күнүгэр диэри ыытыллыаҕа.

Уопсайынан күрэхтэһиигэ 42 судаарыстыбаттан 400-тэн тахса кыттааччы кэлиэҕэ. Аина Моисеева кыттар 48 киилэҕэ диэри ыйааһыҥҥа 29 спортсменка киириэҕэ.

Кинилэр истэригэр Италияттан Аан дойду чөмпүйэнээтин кыайыылааҕа Ассунта Скутто, Казахстантан Аан дойду чөмпүйэнээтин элбэх төгүллээх призера Абиба Абужакынова, Францияттан Олимпийскай оонньуулар боруонса мэтээллэрин хаһаайката Ширин Букли, Швецияттан Тара Бабулфат уонна атын ааттаах-суоллаах кыттааччылар бааллар.

Аина Моисеева татамига тахсыыта олунньу 27 күнүгэр былааннанар.