Айаал Белолюбскай Египетка ыытыллыбыт көҥүл тустуу турнирыгар кыайыылааҕынан таҕыста

Египет Александрия куоратыгар Ибрагим Мустафа аатынан көҥүл тустууга норуоттар икки ардыларынааҕы турнир ыытылынна, диэн «Дьулурҕан» ТГ-ханаала иһитиннэрэр.

Бу түһүлгэҕэ сэттэ дойду, ол иһигэр Афганистан, Египет, Ирак, Кыргызстаан, Таджикистаан бөҕөстөрө кыттыыны ыллылар. Манна Саха сирин тустууга кыһатын иитиллээччитэ, успуорт маастара Айаал Белолюбскай кыайыылааҕынан таҕыста. Кини 57 киилэҕэ бастаан Египет, оттон финалга Афганистан бөҕөстөрүн очукуонан ыраастык кыайталаата.

Санатан эттэххэ, быйылгы сылга киирэн баран, Айаал — Албанияҕа ыытыллыбыт UWW рейтиннээх турнирыгар иккис миэстэни ылбыта.