Айаал Бурцев: «Саҥа сылга соруктары, былааннары туруоруохпут»

Бүгүн, ахсынньы 21 күнүгэр, СӨ Бырабыыталыстыбатын бэрэссэдээтэлэ Кирилл Бычков Олохтоох бэйэни салайыныы сэбиэтин түмүктүүр мунньаҕын ыытта. Тэрээһиҥҥэ улуустар уонна куораттар баһылыктара кыттыыны ыллылар. 

Таатта улууһун баһылыга Айаал Бурцев бу тула санаатын үллэһиннэ:

• Мин маннык мунньахха бастакыбын сырыттым.  Олус долгутуулаах күн буолар. Бүгүн биһиги улууспут үөскээбитэ 111 сыла буолар. Бу мунньах инникибитин быһаарар. Сылы түмүктүүр мунньах туһунан этэр буоллахха, улуус баһылыгынан соторутааҕыта талыллыбыт буоламмын түмүгү таһаарарым эрдэ дии саныыбын. 2024  сыл дьиэ кэргэн сылынан биллэрилиннэ. Сарсын Ил Дархан Айсен Сергеевич Николаев анал этиилээх тахсар. Үүнэр сыл туохха ананарын истиэхпит. Дьэ, ол кэннэ саҥа сылга соруктары, былааннары туруоруохпут.