Айаал Лазарев уонна Виктор Рассадин Олимпиада боруонса мэтээлин иһин киирсиигэ хоттордулар

Парижтааҕы Олимпиадаҕа кытта сылдьар Айаал Лазарев уонна Виктор Рассадин боруонса мэтээл иһин тустууга хоттордулар. 

Айаал Лазарев үһүс миэстэ иһин киирсиигэ Турцияттан Таха Акгюлу кытта туһунна. Манна турок Айаалы 7:0 ахсааҥҥа кыайда. Бу киирсии кэнниттэн бөҕөстөр иккиэн көбүөргэ борцовкаларын устан, тустан бүппүттэрин бэлиэтин көрдөрүлэр.

Виктор Рассадин боруонса финалыгар Албанияттан сылдьар Чермен Валиевка 6:2 ахсааҥҥа хоттордо. Кинилэр бу иннинэ иккитэ көбүөргэ көрсө сылдьыбыттара биллэр: Ярыгин турнирыгар уонна аан дойдуга юниордарга бастыыр иһин киирсиигэ.

Бүгүн сарсыарда Ил Дархан Айсен Николаев телеграм-ханаалыгар: «Айаал Лазарев уонна Виктор Рассадин Олимпиада боруонсатын иһин тустубуттара саха тустуутун оскуолатыгар улахан көрдөрүү буолар. Биһиги салгыы даҕаны Саха сириттэн талааннар тахсалларыгар үлэлиэхпит, Олимпиада пьедесталын үрдүгэр биһиги спортсменнарбыт тахсалларыгар эрэнэбин. Олимпийскай оонньуулары кэтиибит, бүгүн 15:00 чаастан биир дойдулаахпыт Сардаана Трофимова марафоҥҥа сүүрүөҕэ», — диэн суруйда.