Айан билиэтигэр  сыыһа  бэчээттэммити буллахха тугу гыныахха?

Көтөр аалынан эбэтэр пуойаһынан айанныыр билиэккэ сыыһаны  буллахха тугу гыныахха? Олус аймаммаккытыгар сүбэлииллэр. Сүрүнэ, көннөрүллэр дьыала эбит.

Пуойас билиэтигэр сыыһаны таһаарбыттар

Арассыыйа иһигэр айанныырга билиэккэ муҥутаан икки алҕас баар буоллаҕына, билиэт син биир кырдьыктааҕынан ааҕыллар. Ханнык алҕастары бырастыы гыналларый?

-Ыкса турар буукубалар эбэтэр сыыппаралар миэстэлэрэ уларыйбыт;

-ордук буукуба эбэтэр сыыппара;

— буукуба эбэтэр сыыппара көтүтүллүбүтэ.

-ону таһынан араспаанньаҕар, ааккар уонна аҕаҥ аатыгар эбэтэр пааспар нүөмэригэр уонна сериятыгар бииртэн элбэҕэ суох алҕас.

Оттон кыраныысса таһыгар айанныыр буоллахха, сыыһа бэчээттэммит билиэти хос оҥотторуллар.

Сыыһаны хайдах көннөттөрүөххэ?

Билиэти каассаттан атыылаһан баран  тута бэрэбиэркэлээ. Кассир алҕаһаабытын буллаххына, билиэти босхо хос оҥорон биэриэхтэрэ. Арай хойутаан көрдөххүнэ – Арассыыйа тимир суолларын сулууспатыгар эрийиэххэ сөп.

Билиэти онлайн-атыылаһарга иккиттэн ордук  алҕаһы оҥорбут буоллаххына,  балаһыанньаттан тахсарга билиэти туттарыаххын уонна саҥаны ылыаххын наада.

Көтөр билиэккэ сыыһа баар буоллаҕына:

Барыта көтөр хампаанньаҕыттан тутулуктаах – хас биирдии хампаанньа бэйэтэ быраабылалаах.

Алҕаһы хайдах көннөрүөххэ? Төттөрү биэрэн баран саҥаны ылар судургу. Ол гынан баран, бу көрүҥ төннөрүллэр билиэти эрэ ылбыт буоллаххына сөп түбэһэр.

Ону таһынан быстах хааччахтааһыннар бааллар: холобур, сөмөлүөт көтүөн биир чаас иннинэ да төттөрү туттардаххына, эйиэхэ билиэтиҥ толору сууматын биэрбэттэр. Ону таһынан нолуок уонна хомуур сууматын тутан ылыахтарын эмиэ сөп.

Туох сыыһанан  ааҕыллыбатый?

Холобур, көтөр киһи билиэтин ылан баран пааспарын эбэтэр араспаанньатын уларытара. Онуоха докумуоннарга уларыйыылары дакаастаан урукку дастабырыанньаны эбэтэр ыспыраапканы көрдөрүллэр.

Сэрэниэххэ, сэрэхэдийиэххэ…

Билиэккэ сыыһа бэчээттэммити төһөнөн эрдэ булаҕын да, көннөрөр оччонон судургу.

Онлайн-билиэти атыылаһарга ураты болҕомтолоох буол, толорон баран хаста да бэрэбиэркэлээ.

Аргыстарыҥ билиэттэрин эмиэ бэрэбиэркэлииллэригэр көрдөс.

Алҕаһы көрбөккө хаалыахтара диэн кураанахха эрэнимэ.