Айан суолугар хаайтарааччылар Быыһыыр сулууспа бөртөлүөтүн эрэнэ кэтэһэллэр

Уһун ардахтар өрөспүүбүлүкэтээҕи «Өймөкөөн» айан суолун хас да сиринэн сууйан, бу күннэргэ Томтор, Өймөкөөн, Үчүгэй, Сордоҥноох туһаайыытынан айаннаан иһэр дьон аара суолга хаайтардылар.

Айанньыттар сибээс баар сиригэр Күбүмэ учаастагар кэлэн мустан олороллор. Айылҕа иэдээниттэн айан суолугар хаайтарбыт дьон ортотугар Томтор нэһилиэгин баһылыгын  солбуйааччы Айаал Неустроев эмиэ баар. Кини бу курдук кэпсээтэ:

— Дьокуускайтан Томторго айаннаан иһэн иккис күммүн хаайтардым. Бастаан утаа отучча этибит. Билигин 50-ча буоллубут. Уонтан тахса массыына хаайтаран турар. Ол иһигэр, 18 дьахтар, 3 сааһыттан 10 саастаахха тиийэ — 13 оҕо. Ыраах айаҥҥа сылдьар дьон бэйэбитин кытта өйүөлээх эрэ буолан тулуйдубут. Ол эрээри ол да бүтэр кэмнээх буоллаҕа. Ол иһин бүгүн Күмүмэҕэ кэлэн барыбыт өйүөтүн мунньан, астанан аһаатыбыт. Айаҥҥа үксүгэр «Доширак» лапсаны илдьэ сылдьар буолан, онтубутун хомуйан, уопсай миин буһаран истибит.  Бу киэһэ улуус салалтата ыыппыт бородууктата кэлиэхтээх. 50 киһиэхэ орочуоттаан сакаастаабыппыт да, дьон кэлэ турар. Массыына эбиллэн иһэр, 200 куруустаах массына эмиэ баар. Улуус баһылыгын э.т. Саргылаана Можукова сарсын Быыһыыр сулууспа МИ 8 бөртөлүөтэ кэлэн дьону Томторго тиэрдиэҕэ диэтэ. Онон эрэх-турах сананабыт. Оттон  массыыналаах суоппардар уу түһэрин кэтэһиэхпит. Суолу оҥорооччулар уу түстэр эрэ суолу түргэнник  чөлүгэр түһэрээччилэр. 

… Саатар Күбүмэҕэ дьону аһатар урбаанньыт үлэһитэ суох буолан, дьиэтэ хатанан турар эбит. Онон кэлбит астарын хаайтарбыт дьон хайдах астаналлара буолла? Айаал Неустроев «кэлбит аһы уопсай хочуолга буһарыныахпыт» диир. Онон Быыһыыр сулууспа бөртөлүөтү ыытан, Күбүмэҕэ хаайтара сытар дьону Томторго тиэрдэ охсоро буоллар, диэн кыһалҕалаахтар уонна кинилэр чугас дьонноро сарсыҥҥы күнү эрэнэ кэтэһэллэр.