«Айар» кинигэ кыһатын ураты бэлэҕэ

Төрөөбүт тылынан Арассыыйаҕа бастакы эрэгийиэннээҕи мобильнай сыһыарыы үлэҕэ киирдэ.

«Айар» кинигэ кыһата эһиэхэ, ааҕааччыларыгар, үөрүлээх сонуннаах. Ол курдук аныгы үйэҕэ кинигэни ааҕыыны саҥа таһымҥа таһаарар национальнай кинигэ кыһата электроннай уонна аудио кинигэлэрин ЛитАйар диэн саҥа мобильнай сыһыарыытын AppStore нөҥүө тарҕатар.

Бу Арассыыйаҕа төрөөбүт тылынан эрэгийиэннээҕи мобильнай сыһыарыы туһунан бүгүн, ахсынньы 17 күнүгэр, суруналыыстарга, кинигэни таптаан ааҕааччыларга билиһиннэрдилэр.

ЛитАйар туһунан

Бу сыһыарыыга уопсайа 600-тэн тахса:  650 электроннай уонна 40-ча аудио форматтаах саха, нуучча, хотугу аҕыйах ахсааннаах норуоттар тылларынан кинигэлэр киирбиттэр. Сахалыы классикаттан саҕалаан билиҥҥи уус-уран айымньылар, оҕоҕо уонна төрөппүккэ анаммыт литература, фольклорга уонна төрүт култуураҕа, сынньалаҥҥа, булка-алка, анаммыт, уо.д.а. таһаарыылар киллэриллибиттэр.

ЛитАйар туһата

—Манна урут бэчээттэнэн тахсыбыт, ол эрээри атыыга билигин суох, бүппүт эбэтэр сэдэх кинигэлэри булан ааҕыаххытын сөп. Маныаха ханна баҕарар сылдьан төрөөбүт тылгытынан тахсыбыт кинигэни ааҕар, аудионан истэр кыахтанаҕыт. Сыһыарыы аҕааччы киэҥ араҥатыгар ананар. Манна улахан дьон кинигэни ааҕарын, болҕомтотун уурарын сэргэ, эдэр ыччат, оскуола оҕолоро, кырачаан оҕолор сэргиэхтэрэ, сэҥээриэхтэрэ дии саныыбыт, эрэнэбит, — диэн «Айар» кинигэ кыһатын сүрүн дириэктэрэ Август Егоров быһаарда. Үлэни салгыы сайыннарар, кэҥэтэр былааннаахтарын эттэ.

Манна даҕатан эттэххэ, бу кэскиллээх саҕалааһын. Үйэлээх ситим олохтонор. Ол эбэтэр кинигэни таптаан ааҕааччылар бэчээккэ тахсыбыт кинигэлэри атыылаһан ылан дьиэ кэргэттэрин бибилэтиэкэтин хаҥаталларын, хаҥаппыттарын таһынан, өссө, ханна баҕарар сылдьан талбыт кинигэлэрин ааҕар, истэр кыахтаналлара кэнчээри ыччакка бэриллэн, салҕанан, кэҥээн, сайдан иһиэҕэ турдаҕа. Онтон үүнэр көлүөнэ төрөөбүт тылынан кинигэни ааҕара хайдахтаах туһалаах буолуоҕай!

Саҥа 2026 сылы көрсө «Айар» кинигэ кыһатын биир уратытынан суруталларын сэргэ, аахсыйаҕа кыттыахтарын сөп. Ол курдук, сыһыарыыга суруттарарга тус бэйэлэригэр табыгастаах тарыыбы талаллар. Билигин туһанааччылар бастакы ыйга 1 (!)  солк. сурутуу оҥороннор, бибилэтиэкэ кинигэлэрин биир ыйга босхо ааҕар кыахтаналлар.