Айар куттаах ювелир-дизайнер Петр Федотов

Быйылгы “Үлэ киһитэ” бириэмийэҕэ араас идэлээх дьон бэлиэтэннилэр: тыа хаһаайыстыбатын үлэһитэ, эмчит, учуутал, ювелир-чочуйааччы уонна да атын эйгэ үлэһиттэрэ. Бу талан ылбыт идэлэригэр олус бэриниилээх, үлэлэригэр үрдүк көрдөрүүлээх, ылыммыт дьыалаларыгар айымньылаах, эппиэтинэстээх сыһыаннаах дьон ортолоругар ювелир-чочуйааччы, “Киэргэ” ювелирнай дьиэ ювелир-дизайнера Петр Федотов эмиэ баар.

ИДЭҔЭ УҺУЙУЛЛУУ

Мэҥэ Хаҥалас улууһун Бөкө нэһилиэгиттэн төрүттээх Петр Федотов СӨ уонна РФ үтүөлээх артыыһа, ССРС Судаарыстыбаннай бириэмийэтин лауреата Симон Федотов дьиэ кэргэнигэр төрөөбүт буолан, оҕо эрдэҕиттэн айар куттаах. “Олох кыра сааспыттан аҕам миигин уонна эдьиийбин Сардаананы түмэллэргэ илдьэ сылдьара. Ол да иһин буолуо, эдьиийим Сардаана Федотова, СӨ култууратын туйгуна, СӨ ускуустубатын үтүөлээх диэйэтэлэ эмиэ айар куттаах – Саха академическай уонна Олоҥхо тыйаатырдарыгар худуоһунньук-костюмерынан үлэлиир”, – диэн кэпсэтиибитин саҕалыыр Петр Симонович.

26 сыл үлэлээбит (онтон 10 сыла – “Киэргэ” ювелирнай дьиэҕэ) 3-D ювелир-дизайнер Петр Федотов Красноярскайдааҕы художес­твеннай институту бүтэрэн баран, аатырбыт «Золото Якутии» ювелирнай собуокка үлэтин саҕалаабыт.

– Бу тэрилтэҕэ үлэлээн, ювелирнай оҥоһугу быра­йыактааһынтан күндү тааска тиийэ киэргэтэн оҥоруу ымпыгар-чымпыгар диэри уһу­йуллубутум. Уопуттаах ювелир-дизайнер идэтин толору баһылыырбар өйөөбүт, көмөлөспүт дьоммор – «Якутзолото» тэрилтэ салайааччыта, Социалистическай Үлэ Дьоруойа Тарас Десяткиҥҥа уонна «Золото Якутии» ювелирнай собуот дириэктэрэ Леонид Николаевка махталым муҥура суох, – диэн бэлиэтиир сэһэргэһээччим.

АНЫГЫ ҮЙЭ ТЕХНОЛОГИЯТЫН БАҺЫЛААН

Аҕатын түмэллэргэ батыһа сылдьан, араас киэргэллэр оҥоһууларыгар болҕомтотун уурбут кырачаан уол оскуо­ла эрдэҕиттэн айар үлэҕэ ылларбыт. Төрөппүттэрэ уоллара интэриэһин бэлиэтии көрөн, бастаан Пионердар дыбарыастарын куруһуогуттан саҕалаан, Оҕо худуожес­твеннай оскуолатыгар үөрэттэрэ биэрбиттэр. П.П. Романов аатынан Дьокуускайдааҕы худуо­жественнай училищены ситиһиилээхтик бүтэрэн, Петр Федотов салгыы үөрэҕин үрдэтэргэ санаммыт. Онно декоративнай-прикладной ускуустуба худуоһунньуга идэни баһылаан баран, “идэбэр сөпкө да тайаммыппын” дии санаабыт. 1994 сыллаахха СӨ Бэрэсидьиэнин иһинэн үлэлиир “Барҕарыы” Национальнай пуонда исти­пиэдьийэтин ылбыт.

– Саха сиригэр сыыппара дизайнын биир бастакынан баһылаабытым. 3-D бырагыраа­манан ювелирнай оҥоһуктары чочуйууга ылсан, графическай дизайн ымпыгын-чымпыгын билбитим. Онон аныгы үйэ технологията саха ювелирнай ускуус­тубатын саҥа таһымҥа таһаар­быта. Билигин “Киэргэ” ювелирнай дьиэ исписэлиистэрин айар үлэҕэ олохтообут үгэстэрин байытан, сонун сүүрээннэри олоххо киллэриигэ дьулуһабын. Ол курдук, аны ювелирнай дьуолка оонньуурдарын, бриллианнаах уонна араас күндү таастаах саха киэргэллэрин, араас судаарыстыбаннай наҕараадалары, бэлиэлэр, сувенирдары оҥоробун, – диэн кэпсиир ювелир-дизайнер.

“ҮЛЭ КИҺИТЭ” БИРИЭМИЙЭ – ҮЛЭ ТҮМҮГЭ

“Үлэ киһитэ” бириэмийэҕэ түһэриигэ “Киэргэ” маҕаһыын салалтата Петр Федотовы мэктиэлээбитин кэлэктиип уопсай мунньаҕа уопуттаах ювелир-дизайнеры биир санаанан өйөөбүт.

– Александр Кириллович уонна Галина Николаевна Павловтарга үлэ дьонугар сөптөөх усулуобуйаны тэрийэн, биһиги сайдар кыахпытын өрүү сайыннара туралларыгар ис сүрэхпиттэн махтанабын. Салайааччыларбыт ювелирнай эйгэ сайдыытын барытын кэтээн көрөн, аныгы технологияны барытын олоххо киллэрэн иһэр буолан, биһиги, тэрилтэ үлэһиттэрэ, аан дойду сайдыытын кытта тэҥҥэ хардыылаан иһэбит.

“Үлэ киһитэ” бириэмийэ – бу үлэ түмүгэ. Тус үтүөм буол­батах – мин төрөппүттэрим, дьиэ кэргэним, үлэм кэлэктиибин кыайыылара. Махтал буоллун дьоммор-сэргэбэр, биһиги оҥорон таһаарар оҥоһуктарбытын хамаҕатык атыылаһан, бэйэлэрин олохторун киэргэтэллэригэр! – диэн махтал тылын бастыҥын анаата Петр Симонович.

… Бу күннэргэ “Үлэ киһитэ” бириэмийэ лауреата Петр Федотов саҥа ювелирнай оҥоһуга атыыга таҕыста. Онон ыһыахха тэринэ сылдьар дьахталлар “Киэргэ” маҕаһыыныгар тиэтэйиҥ.

КУОНКУРУСТАРГА УОННА БЫЫСТАПКАЛАРГА КЫТТЫЫ

Петр Федотов өссө устудьуоннуу сылдьыаҕыттан араас куон­курустарга кыттан өрөспүүбүлүкэтээҕи тэрээһиннэртэн саҕалаан дойду уонна норуоттар икки ардыларыгар таһым­наах куонкурустарга кыттан, бэйэтин кыаҕын көрдөрөн, таһымын үрдэтэн иһэр.

• «Северное сияние» быыстапка (1999 с.). «Саас» гарнитур – “Бастыҥ дебют” дьупулуома.

• «Северное сияние» быыстапка (1999 с.). “Бриллианнаах бастыҥ оҥоһук” номинация – «Сулустаана» кэмпилиэк 1-кы миэстэ.

• «Атыыга хамаҕатык барар эксклюзивнай киэргэллэр ааптардара» номинация кыайыылааҕа (2008 с.). «Золото Якутии» АУо тэрийбит куонкуруһа.

• “Саха сирин бастыҥ худуоһунньук-дизайнера” (2013 с.).

• «Идэтигэр бастыҥ» бочуоттаах бэлиэ хаһаайына (2018 с.)

Петр Федотов көмүстэн оҥоһуллубут аатырбыт «Шахерезада» браслета уонна көмүстэн оҥоһуллубут нефриттээх “Саас” ювелирнай оҥоһук кэмпилиэгэ «СӨ сокровищницата» быыстапкаҕа харалла сыталлара үгүһү этэр.