Айар куттаахтар көрсүстүлэр

Бэс ыйын 28 күнүгэр киин куоракка алгыстаах ас үс этээстээх сырдык, тып-тап курдук чөкө остолобуой уораҕайыгар бу дьыл түбүктэрин сааһылыы-саамылыы, от үлэтэ саҕаланыан иннинэ, сир аһа үүнүөн иннинэ, сынньана, сэргэхсийэ таарыйа айар куттаах дьон көрсүһүүтэ  буолан ааста.

Айар кут-көҥүл иэйии, хоһоон хонуута, иэйии, сахалыы тыынынан хоһоон түмсүүлэрэ кэлэн тото-хана сэһэргэһэн, сахалыы эҥинэ элбэх бүлүүдэлэртэн аһыы-аһыы, бэртээхэй сэһэн-сэппэн сэлэлээтэ, хоһоон да ааҕылынна, тыл да этилиннэ, сүбэ-саргы да бэрилиннэ. Биһиги киэн туттар ытыктыыр далбарбытыттан Григорьева Анна Петровнаттан, Айар Кут эрэгийиэннээҕи сойуус чилиэниттэн бастакы тылы кини этэн, барыбыт иэйиибит тутулун бэркэ ырытан, саҥа кэлбит доҕотторбутугар бэркэ билиһиннэрэн, инникибитигэр өссө сайдан иһэрбитигэр баҕа санаа бастыҥын бастаата. Бас-көс киһибит тыла-өһө чочуонайа, ылыннарыылааҕа биһиги түөспүтүн өссө төгүл киэн туттуунан толордо.
Арылыйа сылдьар кустугу туппут курдук сананныбыт, сүрдүүн-куттуун сырдаатыбыт, Люция Бандерова-Слепцова-Айыллаана Орто Халыма улууһун уонна Ойуһардаах бөһүөлэгин бочуоттаах олохтооҕо, СӨ култууратын туйгуна, СӨ ырыа айааччыларын сойууһун чилиэнэ Үс кутум дьүрүскэнэ-диэн ырыаларын хомуурунньуга күн сирин көрөн үөрүүтэ үрдэ суох буолла.

Ырыаларын нотаҕа түһэрбит Александр Иванович Дмитриевка-Таммахха ис сүрэхтэн тахсар барҕа махтал тылларын аныыр. Кини ырыа айааччы эрэ буолбатах, алгыс тыллаах эҕэрдэлэрэ, истиҥ иэйии кынаттанан сарсыарда аайы биһигини үөрдэллэр, үрдүккэ кынаттыыллар. Үөрүүлээх көрсүһүү үгэнигэр биһиэхэ биир куттаахтарыгар ырыаларын хомуурунньугун бэлэх ууммута үрдүк үөрүүлээх түгэҥҥэ биир бэлиэ ураты суолталаах буолла.

Бары үөрэн-көтөн тураммыт Люциябытыгар махтал тылларын эттибит. Неустроев Пётр Петрович-Айаанньа уус эҕэрдэ тылларын этэн туран бэйэтин саҥа айбыт буруолуу сылдьар хоһоонун аахпыта олус кэрэхсэбиллээх. Манна даҕатан эттэххэ кини Мандар Уус сурдьа буолар, убайын курдук тимир ууһа, тимири ыллатар киһи. Анастасия Болтокова-СӨ ырыа айааччыларын сойууһун чилиэнэ, бэйэтэ бэркэ байаанынан доҕуһуоллуур айылгылаах мааны Далбар Хотун. Валентина Пинигина-Арылы СӨ суруйааччыларын сойууһугар киирбитэ үрдүк үөрүү. Дохсун ытыс тыаһынан эҕэрдэлээн биир куттаахпытыгар инникитигэр элбэх ситиһиилэри баҕардыбыт.

Егоров Аскалон-Өркөн Дьол СӨ ырыа айааччыларын сойууһун чилиэнэ, алгысчыт, оһуохайдьыт кэмэ кэмчи да буоллар биһигини кытта көрсөн,барбытыгар үтүөнү-кэрэни баҕаран тыл бастыҥын эппитигэр махтал. Никифоров Егор-Басхаай 8-кинигэ ааптара, Күрүлгэн сурунаалга кини көрдөөх кэпсээннэрэ тахсан үөрдэ-өттө. Афанасий Гуриновтан-Арчылантан баран үөрүүлээх-көтүүлээх түгэҥҥэ тутта. Эҕэрдэ бастыҥын этэн, өссө да сайдан-үүнэн иһэтигэр баҕа санаабытын эттибит.

Любовь Семёнова-Сэгэйэ, Феропонтова Евдокия-Сырдыкчаана, Анжелика Жиркова, Рожина Ида-Күндүйээнэ, Чаара, Күн Мичээрэ, Евдокия Уварова-Чуохаана тыл эттилэр. Поэзия дуолугар үрдүк ситиһиилэри баҕардылар. Күн Мичээрэ нууччалыы бэркэ бичийэр эбит, кинигэтин аҕалан биһиэхэ көрдөрдө барыта нууччалыы суруллубут иэйиилэрэ кынаттанан көппүттэр. Атын туспа көрүҥнээх суруйуу, бары көрөн ааҕан астынныбыт, махталбытын биллэрдибит. Бэйэтин билиһиннэрэн элбэҕи сэһэргээтэ. Маны барытын хаартыскаҕа, видеоҕа түһэрэн киэргэппит Евдокия Ивановна Бандероваҕа барҕа махталбытын тиэрдэбит. Айар куттаахтар түмсүһэн элбэҕи бэйэбитигэр туһанан, ис куппутугар иҥэринэн, Алгыһынан арчыланан Амалыйа Айыы Сарыалынан айхалланан, бэртээхэй көрсүһүүттэн дуоһуйан сүрэхтиин сүүдүйэн, көрсүһүүнү сүрүннээбит эдьиийбитигэр Анна Петровна Григорьеваҕа барҕа махтал тылларын аныыбыт. Маннык сэргэх көрсүһүүлэр өссө буола туралларыгар баҕаран туран тарҕастыбыт.

Бочуоттаах сынньалаҥҥа олорор үлэ бэтэрээнэ, хоһоонньут-прозаик түөрт кинигэ ааптара
Евдокия Николаевна Уварова-Чуохаана.