“Айар Уустар” кэллиэс устудьуона Жанна Жиркова “Профессионаллар” чөмпүйэнээт түмүктүүр түһүмэҕэр боруонса мэтээли ылла

Нижнэй Новгородка Бүтүн Арассыыйатааҕы “Профессионаллар” идэ маастарыстыбатын чөмпүйэнээтин түмүктүүр түһүмэҕин креативнай индустрия уонна информационнай технологиялар компетенцияларын түмүгүн таһаардылар. Күрэхтэһиигэ Арассыыйа 46 эрэгийиэниттэн уонна 6 доҕордуу дойдуттан 195 курсант кытынна.

Саха Өрөспүүбүлүкэтин аатыттан “Звукорежиссура” компетенцияҕа “Айар Уустар” креативнай индустрия” кэллиэһин устудьуона Жанна Жиркова кытынна. Кини уһуйааччы-эспиэрэ – Станислав Олесов.

Тэрээһин ыам ыйын 25-30 күннэригэр идэҕэ үөрэтии федеральнай технопааркатын баазатыгар буолла. Жанна үрдүк таһымнаах бэлэмнээҕин көрдөрөн, боруонса мэтээли ылары ситистэ! Сүрүн уонна юниорскай зачекка барыта 24 кыайыылааҕы уонна 48 призеру быһаарбыттар.

Түмүктүүр түһүмэх бырагырааматыгар саҥа көрүҥ киирбит – хамаанданан. Манна араас компетенция кыттааччылара бииргэ үлэлээтилэр. Жанна «Графическай дизайн» уонна «Моушн-дизайн» компетенция бэрэстэбиитэллэрин кытта үлэлээтэ. Кинилэр хамаандалара иккис миэстэни ылла.

Жаннаны уонна кини уһуйааччыта Станислав Петровиһы дьоһуннаах кыайыыларынан эҕэрдэлиибит! Бу туһунан СӨ Идэҕэ үөрэтэр тэрилтэлэри сайыннарар институт саайтыгар суруйаллар.