“Айар уустарга” талбыт хайысхаҥ баар

Билигин креативнай экэниэмикэ диэн элбэхтик иһиллэр буолла. Үчүгэйэ диэн, бу айар талааннаах дьоҥҥо олус сөптөөх хайысха. Дьокуускайга “Айар уустар” диэн ааттыын киһи истэригэр үчүгэйдик иһиллэр Креативнай индустрия колледжыгар туох ханнык идэлэргэ үөрэтэллэрин билсэ тиийдим.   

— От ыйын 25 күнүнээҕи туругунан 1111 сайабылыанньа киирдэ. Саамай элбэх “графическай дизайн” уонна “анимация” идэлэргэ киирдэ, — диир Айар уустар – Креативнай индустрия коллеһын тутар хамыыһыйатын эппиэттиир сэкирэтээрэ Ольга Яковлева. – Сайабылыанньаны атырдьах ыйын 15 күнүгэр диэри тута олоробут, айар идэлэр киэннэрин 10-с чыыһылаҕа диэри. Былырыын 185 миэстэҕэ ылбыт эбит буоллахпытына, быйыл 190 миэстэни көрдүбүт. Уонна быйылгы биир уларыйыыбыт – “Анимацияны” 9-с кылаас кэнниттэн эмиэ арыйдыбыт. Биһиги идэ биэрэр хайысхабыт киэҥ: учуутал, социальнай үлэһит, звукооператор, хаартыскаҕа түһэрээччи, таҥаһы уонна түүлээҕи иистэнээччилэр, дизайнердар, реклама оҥорооччулар,  мультипликатор-худуоһунньуктар. Биһиги айар хайысхалаах идэлэрбитин бүтэрбит оҕолор үксүн ИП, бэйэ дьарыктаах буолаллар. Төлөбүрэ суох миэстэлэрдээхпит. Холобур, дизайнҥа 25 миэстэ көрүллэр, олору сэттэлии гынан хас да салааҕа (отрасль) түҥэтэбит уонна 3-түү төлөбүрдээх миэстэни эбэн биэрэбит. Өскөтө бүддьүөт миэстэтэ таҕыстаҕына, үчүгэйдик үөрэнэр, көхтөөх устудьуон онно көһөн биэрэр.

Туох баар мастарыскыайдарбыт, студияларбыт манна үөрэнэр куорпуспутугар бааллар, арай хаартыскаҕа түһэрээччилэр “Үлэ кыбартаалыгар” Алексей Павлов студиятыгар баран үөрэнэллэр. Халтурин уулуссатыгар турар ЯИПК уопсай дьиэтигэр 42 миэстэлээхпит.

Орто үөрэх кыһата мээнэҕэ “Айар уустар” диэн ааттамматах эбит – кырдьык, талбыт хайысхаҥ барыта баар. 9-с да, 11-с кылаас кэнниттэн киириэххэ сөп. Үөрэнэр сыллара эмиэ араастаах.

Розанна Аммосова, 7 №-дээх оскуола 9-с кылааһын бүтэрбит. Бүгүн туттарсааччылардыын биир бииргэ кэпсэтэр күҥҥэ ийэтин кытта кэлбиттэр.

-Колледжка үс идэҕэ сайабылыанньатын биэрдим: графическай дизайнҥа, рекламаҕа уонна анимацияҕа. Кыһыны быһа аттестатым орто сыаната үчүгэй буоларын туһугар кыһаллан үөрэммитим. Художественнай уонна музыкальнай училищеларга эмиэ докумуоммутун биэрбиппит. Ол эрээри манна графическай дизайнҥа киирэрим буоллар диэн баҕа санаалаахпын. 6-7 кылаастан саҕалаан бу хайысханы интэриэһиргиибин, — диэн кэпсээтэ Розанна.

Оттон биһиги Розаннаҕа бары ситиһиилэри баҕарабыт.