«Айардыын бииргэ». Сыл бастыҥнарын бэлиэтээтилэр

«Айар» национальнай кинигэ кыһата  сыл литературнай түмүктэрин («Сыл бастыҥнара») билиһиннэрэр, эҕэрдэлиир долгутуулаах уонна үөрүүлээх тэрээһинэ бүгүн, олунньу  11 күнүгэр, эстрада судаарыстыбаннай тыйаатырыгар буолла.

Бу сылга тэрээһин «Айар» национальнай кинигэ кыһатын 100 сылын бэлиэтээһин чэрчитинэн уонна Төрөөбүт тыл, сурук-бичик күнүн көрсө ыытылларынан ордук улахан суолталанна.

Ааспыт сыллааҕы үлэни түмүктүүр бэлиэ тэрээһиҥҥэ төрөөбүт тылы харыстааһыҥҥа, ааҕыыны  сайыннарыыга тиһиктээхтик, таһаарыылаахтык үлэлэһэр дьон, бастыҥ ааптардар, ааҕааччылары, кыһаны кытта ыкса үлэлэһэр бибилэтиэкэлэр, култуура эйгэтин үлэһиттэрэ, уо.д.а. түмүстүлэр. 

«Айар кинигэ кыһатын генеральнай дириэктэрэ Август Егоров санаатын үллэһиннэ.

Долгутуулаах уонна үөрүүлээх дьоро тэрээһин чэрчитинэн,  анал ааттарга лауреаттары наҕараадалааһын үөрүүлээх сиэрэ-туома сүргэни көтөхтө, дохсун ытыс тыаһынан арыалланна.

Анал ааттары ыллылар:

Ийэ тылы, суругу-бичиги туруулаһааччы: Жирков А.Н.

Ийэ тыл, сурук-бичик туруу үлэһитэ: Карманова С.Е.

Саамай ааҕар улуус: Мэҥэ Хаҥалас улууһа

Дархан кинигэ: «Ньырбакаан». Дьолуолаах-Пономарев Д.Н.

Бастыҥ проза кинигэтэ: «Кимиэхэ да этимэ!», Корякина С.А.- Сардаана

Ааҕааччы биһирэбилэ: «Хамначчыт кыыс дьылҕата», Гоголев В.И.-Уйулҕан

Далааһыннаах ааптар: Иринцеева Е.С.- Огдо

Оҕо бастыҥ кинигэтэ: «Минньигэс түүл остуоруйалара», Корякина Р. — Хотууна

Бастыҥ үөрэх кинигэтин ааптара: М.Е. Охлопкова, «Букубаар» ааптара

Бастыҥ оонньотор таһаарыы: «Балыксыт Олломолон» (Рыбак), Павлова А.Ф., Прокопьева М.М.

Бастыҥ сайыннарар таһаарыы: «Кыайыы» историческай лотуо, Бочкарева Ф.Ю.

Бастыҥ уруһуйдьут: Егорова Алина

Бастыҥ партнер: киэҥ эйгэҕэ сырдатааччы — СӨ ГАУ «Сахабэчээт»

Бастыҥ партнер: бииргэ үлэлэһээччи — Ю.А. Гагарин аатынан типография

Бастыҥ партнер: ааҕыыны көҕүлээччи (бибилэтиэкэ): Горнай улууһун киин бибилэтиэкэтэ

Бастыҥ партнер: ааҕыыны көҕүлээччи (бибилэтиэкэ), 1 ист. диплом: Уус Алдан улууһун киин бибилэтиэкэтэ

Бастыҥ партнер: ааҕыыны көҕүлээччи (бибилэтиэкэ), 2 ист. диплом: Дьааҥы улууһун бибилэтиэкэтин ситимэ, дириэктэр Лебедева Аэлита Алексеевна; Дьокуускай куорат  киин бибилэтиэкэтин ситимэ, дириэктэр Решетникова Нюргуяна Петровна. Маны сэргэ, өрөспүүбүлүкэҕэ тарҕатар бастыҥ үлэлээх тэрилтэлэр бэлиэтэннилэр.

Тэрээһиҥҥэ кэлбит ыалдьыттар, номинаннар санааларын үлэһиннилэр. «Айар» кинигэ кыһатын быыстапката болҕомтону тардыан тарта. Бу күн кинигэ атыыласпыттар ааптардартан ааптардартан автограф ыллылар.

Үөрүүлээх тэрээһини ырыаһыттар, «Айартаҥас» бренды көрдөрүү, билиини-көрүүнү тургутар оонньуулар ситэрэн-хоторон биэрдилэр.

Ааҕыыны көҕүлээһиҥҥэ бастыҥ партнер анал аатын ылбыт Горнай улууһун киин бибилэтиэкэтин дириэктэрэ Анна Иванова.

«Айар» кинигэ кыһатын былаана элбэх. Үлэтэ сыллата кэҥээн, далааһыннанан иһэр. Ааҕааччылар «Айар» кинигэ кыһатын үлэтэ өссө кэҥээн, сайдан иһэригэр эрэнэллэрин биллэрдилэр, бары үтүөнү баҕардылар.

Сардаана Баснаева хаартыскаларга түһэриитэ