“Айбытым-туппутум, алгыстаах тылларым ананар эһиэхэ – бар дьоммор”

География учуутала, алгысчыт, олоҥхоһут, ырыаһыт, мас ууһа, «Туйма» дьиэ кэргэн экопааркатын тэрийэн Суотту олохтоохторун, ыалдьыттарын айылҕа дьиктилэрин, норуот историятын кытта алтыһыннарбыт,«Үнүгэс» оҕо экологическай лааҕырын тэрийбит, нэһилиэк, улуус аатын күрэхтэһиилэргэ чиэстээхтик көмүскээбит спортсмен, гиирэҕэ успуорт маастара, СӨ айылҕа харыстабылын уонна үөрэҕириитин туйгуна, нэһилиэк бастыҥ дьиэ кэргэнин аҕа баһылыга Данил Данилович Максимов төрөөбүтэ 65 сылыгар аналлаах “Айбытым-туппутум, алгыстаах тылларым ананар эһиэхэ – бар дьоммор” диэн тэрээһиннэр буоллулар.

“Доҕордоһуу” түмэлгэ тэриллибит быыстапкаҕа, Суотту орто оскуолатын аактабай саалатыгар ыытыллыбыт ахтыы киэһэтигэр Данил Данилович төрөөбүт дойдутуттан — Мэҥэ Хаҥалас Балыктааҕыттан бииргэ төрөөбүттэрэ, аймахтара, оҕо сааһын доҕоро кэлэн кыттыыны ыллылар.
Данил Данилович айымньылаах үлэтин быыстапкатын арыллыытын түмэл үлэһитэ Айаал Аргунов алгыһынан саҕалаата, Марк Местников иилээн-саҕалаан ыытта. Нэһилиэкпит баһылыга В.И. Иванов, түмэл директора Н.Я. Новоприезжая, түмэл экскурсияларын тэрийээччи В.П. Гоголева этиилэригэр айылҕаттан бэриллибит улахан талааннаах киһи олорон ааспытын, кини үлэлэрин кыыһа Екатерина Даниловна музейга биэрбитэ сөптөөх быһаарыныы буоларын, Данил Данилович дириҥ ис хоһоонноох үлэлэрэ бар дьоҥҥо инникитин да биһирэтэ, кэрэхсэнэ турар аналлаахтарын эттилэр. Салгыы Екатерина Даниловна быыстапканы олус кэрэхсэбиллээхтик кэпсээтэ, билиһиннэрдэ.
Суотту орто оскуолатын аактабай саалатыгар буолбут тэрээһини Суотту бибилэтиэкэтэ ыытта. Манна тыл этээччилэр нэһилиэкпит биир бастыҥ ыалын Максимовтар дьиэ кэргэн тустарынан истиҥник-иһирэхтик аҕыннылар. Данил Данилович дэгиттэр талаанын, успуортка, култуура эйгэтигэр бары өттүнэн дьоҕурдааҕын сөҕөн кэпсээтилэр, көнө, сэмэй майгытын бэлиэтээтилэр. Кини айан-тутан хаалларбыта үйэлээх буоларыгар, киэҥ эйгэҕэ тахсарыгар баҕа санааларын эттилэр.
Ахтыылары М.Н.Абрамов, С.И.Ксенофонтов, В.В.Дегтярев, Е.И.Иванова, В.З.Стрекаловская, Р.И.Татаринова, Е.И.Свинобоева, Балыктаахтан Д.Максимов улахан эдьиийэ Анисия Даниловна Максимова, балта Ирина Даниловна Афанасьева, оҕо сааһын доҕоро С.С.Кычкин оҥордулар. Д.Д. Максимов чинчийэр үлэҕэ сыһыарбыт үөрэнээччитэ Р.П.Бубякина, кылаас салайааччытынан айымньылаахтык үлэлээбит кылааһын үөрэнээччитэ З.Н.Бочкарева ахтан-санаан кэпсээтилэр. Зинаида Николаевна Дьокуускайтан С.С.Лебедева ыыппыт истиҥ тыллардаах суругун кыыһыгар туттарда. Түмүккэ Суотту орто оскуолатын дириэктэрэ И.М.Петухова Данил Данилович үлэтигэр үрдүк сыанабыл биэрдэ уонна оскуолаҕа кини аатынан география хоһо тэриллэрин эппитин мустубут дьон биһирээн ытыс тыаһынан доҕуһуоллаатылар.

Раиса Черкашина,

Суотту, Уус Алдан.

Хаартыска Р.Бубякина түһэриитэ.