Айдаан тахсыбытыгар түүҥҥү кулуупка полицейскайдар кэлбэтэхтэр диэн сымыйа сурах тарҕанна

Бу күннэргэ социальнай ситимнэргэ куорат биир түүҥҥү кулуубугар айдаан тахсыбытыгар полиция үлэһиттэрэ кэлбэтэхтэрин туһунан иһитиннэрии тарҕанна. Онуоха ИДьМ  пресс-сулууспата интэриниэккэ тарҕаммыт сурах дьиҥэ суоҕун туһунан иһитиннэрдэ.

Ол курдук, балаҕан ыйын 23 күнүгэр, түүн 04:40 чааска полиция 1-кы нүөмэрдээх  отделын дьуһуурунай чааһыгар  төлөпүөннээн Михаил Николаев проспегар баар түүҥҥү кулуупка  полицескайдары ыҥырбыттар. Туһааннаах аадырыһынан патруллуур-постовой сулууспа   ыытыллыбыт.  Миэстэтигэр полицейскайдар тиийбиттэригэр, тэрилтэ үлэһитэ уонна  төрөөбүт күнүн бэлиэтии сылдьар дьахтар утары тахсыбыттар. Кинилэр полицияҕа киирбит иһитиннэриини мэлдьэспиттэр.   Онуоха полицейскайдар иһирдьэ баар дьону кытары кэпсэппиттэригэр, туһааннаах дьон этиилэрин бигэргэппиттэр уонна сайабылыанньа, быһаарыы биэрэртэн аккаастаммыттар.

Биир күн ааспытын кэннэ, полиция 1-кы нүөмэрдээх  отделыгар 35 уонна 46 саастаах икки дьахтартан  сайабылыанньа киирбит. Сайабылыанньаҕа суруллубутунан тэрээһин ыалдьыта кинилэри  эт-хаан эчэтиитин оҥорбутун ааһан,   өлөрөрүнэн куттаабыт уонна  суотабай төлөпүөнү алдьаппыт.   Быһылаан тахсыбыт сиригэр силиэстийэлиир-суһал бөлөх тиийэн быһаарсыбыт. Хомуллубут матырыйаал борокуратуураҕа ыытыллыбыт.