«Айхал» киинэни көрөн баран…

Алтынньы саҥата Саха сирин киинэ тыйаатырдарыгар «Айхал» криминальнай драма киэҥ экрааҥҥа тахсан, үгүс сэҥээриини ылла.  Киинэ дьиҥнээх олоххо буолбут түбэлтэлэргэ олоҕурар уонна өрөспүүбүлүкэҕэ урут устуллубатах тиэмэни көтөҕөр. 

Киинэ режиссера  Дьулусхан Андросов, сүрүн оруолларга  Эрхан Слепцов, Дьулустаан Корнилов, Татьяна Легантьева, Ильяна Павлова оонньууллар.

Ааспыт нэдиэлэҕэ  Дьокуускай куорат Саха гимназиятын үөрэнээччилэрэ «Айхал» киинэҕэ сылдьан, артыыстары кытары көрсөн баран, санааларын үллэһиннилэр.

Биһиги алтынньы 22 күнүгэр «Айхал» диэн киинэҕэ кылааһынан  сырыттыбыт.  Элбэххэ үөрэтэр киинэ. Киһини толкуйдатар. Үчүгэй сюжеттаах уонна бэрт баҕайы артыыстардаах киинэ. Мин бүтэһигэр, Дархан өлбүтүгэр, ытаабытым. Эдэр ыччаттар олохторун уонна тугунан дьарыктаналларын көрдөрөр.

Саамай сөбүлээбит оруолларым — Уруй уонна Янчик. Уруй наһаа үчүгэй, кыраһыабай кыыс.

Атласова Сайнаара.

 «Айхал» киинэни көрөн баран наһаа сөбүлээтим. Онно РТС уонна Холбос диэн мустуулар бэйэ-бэйэлэрин кытта охсуһаллар уонна абааһы көрсөллөр. Сүрүн дьоруой – Айхал. Быраата Холбосторго киириэн наһаа баҕарбыт. Ол эрээри убайа киллэриэн баҕарбат. РТС-ка киирэр, үөрэҕэр мөлтүүр, маҕаһыынтан уорар уонна бүтэһигэр өлөн хаалар.

Мин санаабар, Айхал Дарханы кытта иккиэн үчүгэйдик кэпсэппиттэрэ буоллар, бу барыта маннык түмүктээх буолуо суох этэ.

Ол иһин бу киинэни көрөн баран дьиэ кэргэни кытта куруук кэпсэтэ, бэйэ-бэйэни көрө-истэ сылдьыахтаахпыт дии санаатым.

Федорова Нарыйа.

Алтынньы  22 күнүгэр «Айхал» диэн киинэҕэ кылааспытынан бара сырыттыбыт. Барыта 15 оҕо уонна кылааспыт салайааччыта Марианна Васильевна Ордахова.

Бастаан көрөрбөр, кырдьык сөбүлээбэтэҕим, онтон ис хоһоонун билэн, киинэ иһигэр киирэн баран дьэ сөбүлээтим. Артыыстар оруолларын наһаа бэркэ толордулар.

Мин санаабар, бу киинэни устубатахтара буоллар, ким да дьиҥнээхтии туох буолбутун билиэ суох этилэр.  

Ол кэннэ оскуолабытыгар киинэҕэ оонньообут артыыстары кытта көрсөн кэпсэтии буолбута. Биһиги оскуолабыт үөрэнээччитэ оонньообутун билэн  үөрдүбүт.

Акимова Валерия.

Мин «Айхал» диэн киинэни сөбүлээтим! Элбэххэ үөрэтэр. Эдэр ыччаттар охсуһуулара, табахтыыллара  үчүгэйгэ тириэрдибэт. Киинэ бүтэһигэр Дархан өлөр.  Манна эдэр ыччаттар үгүс кыһалҕалара көстөр.

Артыыстары кытта кэпсэтиигэ хайдах киинэҕэ уһуллубуттарын, ыарахаттары көрсүбүттэрин сырдаттылар.

Попова Диана.

Биһиги кылааһынан «Айхал» киинэҕэ баран кэлбиппит. Мин ити киинэни сөбүлээтим.  Дархан, Сашок, Ян уонна Уруй диэн дьоруойдары ордук сөбүлээтим. Бу киинэҕэ “группировка”, “мустуу” тиэмэтэ көтөҕүллүбүт. Бу балар куһаҕаттар. Ити группировкаларга киирэн оҕолор, эдэр ыччаттар өлөн да хаалыахтарын сөбүн туһунан киинэнэн сэрэппиттэр. Бу киинэҕэ оонньообут артыыс биһиги оскуолабытын бүтэрбитин билэн, оскуолабынан өссө киэн тутуннум.

Неустроева Адриана.

Мин санаабар, киинэ оҕолору, ыччаттары үөрэтэр сыаллаах уһуллубут. Куһаҕаны, үчүгэйи араара үөрэнэргэ.  Араас мустууларга киирбэккэ, бэйэ-бэйэҕэ көмөлөсүһэргэ, кими да кырбаабакка, охсуспакка сылдьарга үөрэтэр.

Корнилов Алеша.

Алтынньы  22 күнүгэр «Айхал» диэн киинэҕэ кылааспын кытта сырыттым. Киинэ эдэр ыччат туһунан. Оҕолор мустууларын туһунан кэпсэнэр:  РТС уонна Холбос. Сүрүн дьоруойдара — Айхал (Холбос), Сашок (РТС), Дархан (РТС, Айхал кыра быраата), Уруй (Айхал кыыһа). Бары бэйэ-бэйэлэрин абааһы көрөллөр. Кырдьыктыы эттэххэ, интэриэһинэй уонна хомолтолоох. Артыыстар бэркэ талыллыбыттар, оонньуулара даҕаны итэҕэтиилээх.

Потапова Милана.