Айлана Степанова «Азия оҕолоругар» тылбаасчытынан үлэлиир

Таиланд сүүмэрдэммит  хамаандатыгар тылбаасчыт-атташе Айлана Степанова «Азия оҕолоро» норуоттар икки ардыларынааҕы спортивнай оонньууларга үлэтин туһунан сырдатта.

— Айлана, үтүө күнүнэн! Тылбаасчыт идэтин тоҕо талбыккын кэпсээ эрэ.
— Үтүө күнүнэн! Мин оскуолаҕа сылдьан тыл предметтарыгар үчүгэйдик үөрэнэр буолан,  оскуола кэнниттэн гуманитарнай хайысхалаах үөрэххэ киирэрбин  эрдэттэн  быһаарыммытым. Ол эрээри тылбаасчыт идэтин талыам диэн санааччым суох.
— Бу идэҕин баһылыырга уопсайа хас сыл уонна ханна үөрэнниҥ?
— 2016 сыллаахха Хабаровскай куоракка баар Тихоокеанскай судаарыстыбаннай университекка  5 сыл лингвист-тылбаасчыт идэтигэр үөрэммитим. Ол үөрэнэ сылдьан устудьуоннары атастаһыы бырагырааматынан 2018-2019 с. Кытайга үөрэммитим. Онон, английскай уонна кытай тылларын баһылаабытым. Билиҥҥи кэмҥэ тылбаасчыт быһыытынан үлэлээбитим 3 сыл буолла.
— Үлэҥ ыарахан өрүттэрэ ханныктарый?
— Тылы  эҥкилэ суох баһылыырыҥ таһынан, омуктар  култуураларын, майгыларын билиэххин наада. Дьыалабыай кэпсэтиилэр сиэрдэрин  эмиэ билиэхтээххин.  Үчүгэй өрүттэрэ баһаам буоллаҕа дии. Атын омуктары кытта алтыһыы, сири-дойдуну көрүү уонна билииҥ-көрүүҥ кэҥээһинэ.
— Тылбаасчыт буолуон баҕалаах дьоҥҥо туох сүбэ-ама биэриэҥ этэ?
— Куруук билиилэрин кэҥэтэ сырыттынар. Эбии саҥа тыллар, тиэрминнэр үөскүүллэр. Төһө элбэх билиини ылаҕын, соччонон кэлин тылбаастыыргар чэпчэки буолар. Ол иһин, эрудицияҕытын хаҥата сылдьыҥ, сонуннары, кинигэлэри ааҕыҥ.
— «Азия оҕолоругар» ханнык дойду хамаандатын кытта үлэлиигин?
— Бу “Азия оҕолорун” оонньууларыгар миигин тылбаасчыт-атташе быһыытынан Таиланд  бөлөҕөр сыһыарбыттара. Хамаандаҕа 45 киһи баар.
— Кинилэри кытта ханнык тылынан кэпсэтэҕин?
—Бөлөхпүн  кытта английскайдыы кэпсэтэбин. Кинилэр  английскай тылын үчүгэйдик билэллэр, онон өйдөһөбүт.
— Билигин үлэҥ күнэ хайдах ааһарый?
— Тылбаасчыт үлэтэ сарсыардаттан саҕаланар. Салайааччылары кытта үлэлэһэрим таһынан, өссө бу хамаанданы кытта эмиэ тэҥҥэ үлэлэһэ сылдьабын. Холобур, хамаанда мандаатнай хамыыһыйа  ааһарыгар, регистрацияланарыгар, дьарыктарыгар, айанныылларыгар  тэҥҥэ сылдьан  тылбаастыыбын. Уопсайынан хамаанда ханна барарынан үлэлиибин. Ону таһынан салайааччылар эмиэ дьыалабыай көрсүһүүлэргэ сылдьаллар, холобур, миниистири кытта көрсүөхтээхтэр. Онно эмиэ тылбаасчыт быһыытынан сылдьабын.
— Үлэҕэр үрдүк ситиһиилэри, бириэмэ булан ыйытыктарбытыгар хоруйдаабыккар улахан махтал!
—Махтал!

Сайыына Колодезникова, Тускуйана Игнатьева