Аймаҕар көмөлөһөөрү кирэдьиит ылан, улахан иэскэ киирбит

Дьокуускайдааҕы полиция 1-кы №-дээх отделын дьуһуурунай чааһыгар олохтоох дьахтар кини аатыгар сокуоннайа суохтук 145 тыһ.солк. кирэдьиит ылбыттарын туһунан иһитиннэрбит. Дьахтар эппитинэн, бу туһунан кини бааҥҥа бэйэтэ кирэдьиит оҥотторо тиийбитигэр, иэстээҕинэн аккаастаабыттар диэн СӨ ИДьМ пресс-сулууспата суруйар.

Холуобунай ирдэбил үлэһиттэрэ быһаарбыттарынан, кирэдьиити дьахтар аатыгар аймаҕа, эрдэ сууттана сылдьыбыт 38 саастаах эр киһи ылбыт.

Быһаарыллыбытынан, эмсэҕэлээччи эрдэ бу аймаҕар көмөлөһөөрү, бэйэтин аатыгар кирэдьиит каартатын оҥотторон, киниэхэ биэрбит. Эр киһи бастаан кирэдьиити төлөөн испит, онтон салгыы каартанан туттан, улахан иэһи мунньубут. Харчыны бэйэтин тус наадаларыгар туттубут.

Эр киһиэхэ түөкүннээһининэн холуобунай дьыала тэриллибит.