Айсен Егоров уонна Тунаара Федорова — дуобакка Арассыыйатааҕы Куубагын кыайыылаахтара!

Айсен Егоров уонна Тунаара Федорова дуобакка  (чаҕылҕанныы, түргэн бырагыраамаларга)  Арассыыйа Куубагын кыайыылаахтарынан буоллулар. Күрэхтэһиилэр Краснодарскай кыраайга ыам ыйын 29 күнүгэр диэри ыытыллаллар.

Күрэхтэһиигэ эр дьон ортолоругар дойду эрэгийиэннэрин 30-тан тахса спортсмена кыттыыны ылаллар.

16 саастаах Айсен Егоров турнир таблицатыгар утарсааччыларын кытта ситиһиилээхтик киирсэн, түргэн оонньууга кыһыл көмүс мэтээли ылла. Иккис миэстэни Татарстан гроссмейстера Дмитрий Цинман ылла, оттон үһүс миэстэҕэ Ленинград уобалаһыттан гроссмейстер Мажит Саршаев тигистэ. Күрэхтэһиигэ сэттэ гроссмейстер, биэс успуорт маастара, ону таһынан уон успуорт маастарыгар хандьыдааттар кытталлар, диэн «Триумф» пресс-сулууспата иһитиннэрэр. Оттон эр дьон ортолоругар үрүҥ көмүс мэтээли дуобатчыт Николай Стручков ылла.

Дьахталлар ортолоругар Саха сирин сүүмэрдэммит хамаандатын дуобатчыта Тунаара Федорова Арассыыйа Куубагын кыайылааҕынан буолла. Кини сүүрбэттэн тахса утарсааччытын ортотугар түргэн бырагырамааҕа кыайыылаах таҕыста.