Айсен Николаев ахсынньы 23 күнүгэр Ил Түмэҥҥэ туһаайан этиитин иһитиннэриэҕэ

Ахсынньы 23 күнүгэр Дьокуускай бириэмэтинэн күнүс 12:00 чааска Айсен Николаев  сыл аайы оҥоһуллар Ил Түмэҥҥэ туһаайан этиитин иһитиннэриэҕэ.

СӨ Ил Дархана ааһан эрэр  сыл сүрүн түмүктэрин таһаарыаҕа, өрөспүүбүлүкэ салгыы сайдыытын чугаскы уонна уһун кэмнээх кэскиллээх стратегиятын торумнуоҕа, өрөспүүбүлүкэ парламенын, Бырабыыталыстыбатын уонна олохтоох салайыныы уорганнарын үлэтин сүрүн соруктарын туруоруоҕа.

Туһаайан этиигэ норуот дьокутааттара, СӨ Бырабыыталыстыбатын чилиэннэрэ, муниципальнай оройуоннар уонна куораттааҕы уокуруктар баһылыктара, тэрилтэлэр салайааччылара кыттыыны ылыахтара.

Саха сириттэн Федерация Сэбиэтин сенатордара уонна Судаарыстыбаннай Дуума дьокутааттара, суут былааһын уонна борокуратуура бэрэстэбиитэллэрэ, федеральнай  былаас уорганнарын өрөспүүбүлүкэтээҕи территориальнай уорганнарын салайааччылара, боломуочунайдар, ону таһынан уопсастыба лидердэрэ уонна диэйэтэллэр кытталлара күүтүллэр.

Тэрээһин Бырабыыталыстыба 1 №-дээх дьиэтин Өрөспүүбүлүкэ саалатыгар буолуоҕа. Быһа эпиири «Якутия 24», «Саха» НКИК, «Россия 24» телеханааллар көрдөрүөхтэрэ, «Тэтим» уонна «Радио России Саха» араадьыйалар биэриэхтэрэ.