Айсен Николаев: “Арктика сайдыыта энергетиката суох кыаллыбат”

Ил Дархан Айсен Николаев Мурманскайга Арктика норуоттар икки ардыларынааҕы пуорумнарыгар  РФ Судаарыстыбаннай сэбиэтин алта хамыыһыйатын  холбоһуктаах мунньаҕар кытынна.  Ил Дархан “Арктика уонна Хотугу муора пордун сайдыылара” национальнай бырайыакка анаммыт  кэпсэтиигэ Арктика сирэ-уота энергетика боппуруостарын быһаарыыта суох кыаллыбатын бэлиэтээтэ.

«Биһиги киэҥ хабааннаах бырайыактары былаанныахпытын сөп. Ол гынан баран, барыта уота уонна сылааһа суох кыаллыбат. Арктиканы баһылааһын генерация саҥа эбийиэктэрин тутууну, баар генерацияны  модернизациялааһыны уонна уот ситимин хаһаайыстыбатын тутууну эрэйэр”, — диэтэ РФ Судаарыстыбаннай сэбиэтин “Энергетика” хайысхаҕа хамыыһыйатын баһылыга Айсен Николаев.

Кини Росатом олоххо киллэрэр  стратегическай бырайыактара, кыра кыамталаах  атом ыстаансыйатын киллэрэн туран, Арктикаҕа кэскиллээх минеральнай-сырьевовой кииннэри уотунан хааччыйыы  боппуруостарын бэйэлэригэр ылыахтарын  бэлиэтээтэ.

Саха сиригэр 73 гибриднай энергокомплекс тутуллуохтааҕыттан 12-тэ номнуо туһаныллар. Бу аҥаардас 2024 сылга 1577 туонна дизельнэй оттугу кэмчилээтэ (177 мөлүйүөн солкуобайы).

Локальнай генерацияны салгыы сайыннарарга Айсен Николаев кирэдьииккэ үрдүк бырыһыан ставкатын уонна инвестордарга судаарыстыба өйөбүлүн боппуруостарын быһаарыыны  суолталааҕынан ааҕар.

Арктика сайдыытын атахтыыр  чахчынан уот тарыыба улаатыытын  содулларын ааҕар. Айсен Николаев бэлиэтээн эппитинэн,  билигин Судаарыстыбаннай сэбиэт хамыыһыйата Арассыыйа Энергетикаҕа  министиэристибэтин, Арассыыйа ФАС кытары Арассыыйа бэрэсидьиэнэ биир кэлим быһаарыыны ылыныы туһунан сорудаҕар  үлэлииллэр. Кини саҥа Национальнай бырайыакка  уонна пуорум түмүк резолюциятыгар уот тарыыбыгар тэҥ туруктаах тарыыбы хааччыйарга миэрэлэри ылар туһунан этии киллэрбитэ.

Ил Дархан  ураты болҕомтону хотугу муора суолун сайыннарыыга уонна  Хотугу сир аҕыйах ахсааннаах төрүт норуоттарын өйүүргэ уурда.

«Аҕыйах ахсааннаах төрүт норуоттар – Арктика төрүт  хаһаайыттара. 2021 сыллаахха Арктикаҕа аҕыйах ахсааннаах төрүт норуоттар үгэс буолбут олохторун укулаатын  судаарыстыба өйөөһүнүн бырагыраамата ылыллыбытын үрдүнэн, кинилэр олохторун тупсарыыга биллэр хамсааһын тахса илик. Онон, Хотугу сир төрүт норуоттарын  өйөөһүнү  көҕүлүүр  национальнай бырайыакка туспа блогунан киллэрэргэ этии киллэрэбин”, — диэн Саха сирин баһылыга түмүктээн эттэ.

«Арктика – территория диалога»  норуоттар икки ардыларынааҕы пуорум Арктика эрэгийиэнин сайыннарыы боппуруостарыгар биир сүрүн былаһаакканан буолар.