Айсен Николаев Арктикаҕа эбии ас-үөл тиэрдиитин тэрийэргэ сорудахтаата

Айсен Николаев социальнай суолталаах ас-үөл табаардарын тиэйиини тэрийиигэ мунньах ыытта уонна Арктика улуустарын олохтоохторугар дьоҕус авиациянан эбии сибиэһэй аһы тиэрдэргэ сорудахтаата.

Ил Дархан хотугу улуус олохтоохторуттан маҕаһыыннарга ас-үөл кэккэ көрүҥнэрэ суоҕун туһунан иһитиннэриилэр киирбиттэрин бэлиэтээтэ.

Бырабыыталыстыба уонна Арктика муниципальнай тэриллиилэрин салайааччыларын иһитиннэриилэрин истэн баран, кини Саҥа дьыл бырааһынньыктарыгар диэри Арктика эргиэн-логистика кииннэригэр сибиэһэй фруктаны, оҕуруот аһын, сымыыты уонна эбии бородууктаны тиэрдэргэ сорудахтаата.

«Арктикаҕа олох уонна үлэ — олохтоохтор хорсун санааны уонна тулууру ирдиир күннээҕи тургутуу. Хотугу бөһүөлэктэрбит олохтоохторо маҕаһыыннарга ас-үөл тиийбэтин туһунан миэхэ суруйаллар — маннык табыллыбат. Уопсай сорукпут — дьоҥҥо өйдөнөр уонна көдьүүстээх үлэ тиһигин олохтооһун. Сөбүлэһиитэ суохтан эбэтэр ээл-дээл сыһыантан үөскүүр харгыстар судургу дьон күннээҕи олохторугар дьайыа суохтаахтар. Боппуруостары быһаарарга наадалаах ресурсалар бары көрүллүөхтээхтэр, билигин сүрүнэ — сорудахтары хас биирдии түһүмэххэ чопчу уонна эппиэтинэстээхтик толоруу», — диэн Айсен Николаев бэлиэтээтэ.

Ил Дархан Саҥа дьылга диэри сибиэһэй аһы-үөлү дьоҕус авиациянан тиэрдиини тэрийэргэ, ону тэҥэ 2026 сылга маннык харгыстары таһаарбат курдук сорудахтаата. Бородууктаны кыһыҥҥы суолунан тиэрдиини ураты хонтуруолга ылылыахтааҕын дьаһайда.

Санаттахха, Айсен Николаев Ил Түмэҥҥэ туһаайан этиитигэр Арктикаҕа ороскуоттар өрөспүүбүлүкэ бүддьүөтүн көмүскэллээх ыстатыйаларынан буолуохтаахтар диэн эппитэ.

2025 сылга өрөспүүбүлүкэ бары 13 Арктика улууһугар эргиэн-логистика кииннэрэ  арыллыбыттара. Быйылгы сылга бу кииннэргэ 500 туоннаттан тахса сибиэһэй оҕуруот аһа, ол иһигэр олохтоох бааһынайдар үүннэрбит хаппыысталара, сүбүөкүлэ, моркуоп уонна хортуоппуй тиэрдиллибитэ.