Айсен Николаев Арктикатааҕы судаарыстыбаннай ускуустуба, култуура уонна креативнай индустриялар университетын устудьуоннарын кытта көрүстэ

Айсен Николаев олунньу 6 күнүгэр Арктикатааҕы судаарыстыбаннай ускуустуба, култуура уонна креативнай индустриялар университетыгар  сырытта. Үрдүк үөрэх кыһата саҥа статуһун  2025 сыл бүтүүтүгэр ылан, Уһук Илиҥҥэ креативнай индустриялар бастакы университеттарын аатын ылбыта.

Саха сирэ Арассыыйаҕа креативнай экэниэмикэ эйгэтигэр инники күөҥҥэ сылдьар миэстэтин салгыыр. Айар индустриялары сайыннарыыга биир бастыҥ хайысха – каадырдары бэлэмнээһин. Үгүстэрин эрэгийиэн иһигэр, чуолаан университекка бэлэмнииллэр, 3,5 тыһыынчаттан тахса выпускник култуура, ускуустуба, үөрэх уонна наука тэрилтэлэригэр үлэлииллэр. Кинилэр национальнай тыйаатыр туруорууларын уонна IT-бырайыактары оҥороллор,  дизайн-кодтарын оҥорон таһаараллар, норуоттар икки ардыларынааҕы бириэмийэлэри ылаллар – М.И. Глинка аатынан вокальнай куонкурустан саҕалаан киинэ уонна тыйаатыр наҕараадаларыгар тиийэ.

«Арктикатааҕы судаарыстыбаннай ускуустуба, култуура уонна креативнай индустриялар университета, Уһук Илиҥҥэ креативнай индустриялар бастакы университета, ыччакка тардыһыы киинэ буолла уонна култуураны, ускуустубаны уонна технологиялары түмэр. Устудьуоннар бэйэлэрэ этэллэринэн, үөрэх кыһата биир сиргэ араас идэлэр уонна хайысхалар түмүллүбүт ураты эйгэтин иһин талаллар. Манна кэлэр кэскиллээх артыыстар уонна режиссердар, худуоһунньуктар уонна дизайнердар, музыканнар, ону таһынан сыыппара технологияларын кытта үлэлиир исписэлиистэр үөрэнэллэр. Саха сиригэр бу олус суолталаах. Биһиги өрөспүүбүлүкэ иһигэр сайдыы биир саамай кэскиллээх уонна бастыҥ салаатыгар – креативнай экэниэмикэҕэ  каадырдары бэлэмниибит», – диэн Айсен Николаев сырыытын түмүгүнэн бэлиэтээтэ.

Саха сирин баһылыга ювелирнай оҥоһуктар быыстапкаларын көрдө, арктическай урбанистика бырайыактарын, ону таһынан «Саҥа саха киинэтэ» уонна «Анимация» хайысхаларын кытта билистэ. Кини туспа норуодунай үнүстүрүмүөннэр Арассыыйа-Кытай холбоһуктаах ыччат оркестрын бэлиэтээтэ уонна култууралар алтыһыыларын күүстээх холобурунан ааттаата.

Университет өрөспүүбүлүкэ орто профессиональнай уонна үрдүк үөрэх кыһаларын кытта өрөспүүбүлүкэҕэ Култуура сылын тэрээһиннэрин ыытыыга көхтөөхтүк кыттыаҕа. Креативнай индустриялар кыра академияларын чэрчитинэн өрөспүүбүлүкэ оскуолаларын кытта бииргэ үлэлээһин күүһүрүөҕэ. Быйылгы үөрэх дьылыгар 9 оскуола уонна биир тыһыынчаттан тахса үөрэнээччи хабылынна. Ону таһынан улуустар култуурунай кодтарын концепциятын оҥоруу салҕаныаҕа. Маннык үлэлэр Ньурба уонна Нам улуустарыгар номнуо толоруллубуттара. Билиҥҥи кэмҥэ Орто Халыма уонна Чурапчы улуустарыгар оҥоһулла тураллар.

Сиһилии: https://www.sakha.gov.ru/news/21990