Айсен Николаев байыастары  кытта көрүстэ

Айсен Николаев байыаннай дьайыы инники кирбиитигэр Саха сириттэн сылдьар байыаннай сулууспалаахтары кытта көрүстэ. Өрөспүүбүлүкэ баһылыга анал байыаннай дьайыыга кыттар Саха сирин байыастарыгар бойобуой сорудахтары толорууга наадалаах гуманитарнай көмөнү, тиэхиньикэни уонна тэрили тиксэрдэ.

Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр. Аҕалыллыбыт көмө иһигэр – «Сокол» квадроцикллар, «Тимир Ат» электроматасыыкыллар, «Матрикс-3» уонна «Матрикс-4» квадрокоптердар, саха хампаанньаларын дронтан көмүскэнэр оҥоһуктара, Саха сиригэр оҥоһуллубут «Ворон» радио-электроннай прибордара бааллар.

«Радио-электроннай прибордарын бастакы холобурдара үчүгэй түмүгү көрдөрдүлэр. Бүгүн улахан баартыйаны аҕаллыбыт, бойобуой дьайыылар усулуобуйаларыгар тургутан көрүөхпүтүн баҕарабыт. Сэбилэниилээх күүстэр үрдүктүк сыаналаатахтарына, прибордары аҕалыы элбиэҕэ. РЭБ-тэн ураты, атын тэриллэри эмиэ аҕаллыбыт. Тиэхиньикэни тиксэрдибит. Саха сирэ хаһан да туора туран хаалбат, биһиги байыаннай сулууспалаахтарбытыгар мэлдьи көмөлөһөбүт уонна, биллэн турар, бу үлэбитин салгыы ыытыахпыт», — диэн Айсен Николаев бэлиэтээтэ.

Ил Дархан байыастарга өрөспүүбүлүкэ бары олохтоохторун аатыттан махтал тылларын тириэртэ, кинилэр толорор соруктарын улахан суолталааҕын бэлиэтээтэ, инникитин фрону хааччыйыыга баҕа санааларын, этиилэрин иһиттэ, алгыс тылын эттэ. Кини хорсун быһыыларынан аатырбыт Саха сирин уолаттарыгар РФ судаарыстыбаннай наҕараадаларын уонна дойду Оборуона министиэристибэтин биэдэмистибэннэй наҕараадаларын туттарда.

«Миэхэ байыаннай дьайыы инники кирбиитигэр хорсун быһыыны оҥорбут биир дойдулаахтарбар-саха уолаттарыгар наҕараадалары туттарар үрдүк чиэс тигистэ. Биһиги саллааттарбытынан киэн туттабыт. Кинилэр үгүстэрин мин тус бэйэм билэбин, эйэлээх олоххо хаста да көрсүбүтүм. Барыларыгар кыайыылаах-хотуулаах түргэнник эргиллэллэригэр баҕардым. Саха сиригэр кинилэри күүтэллэр, таптыыллар уонна сыаналыыллар», — диэн Айсен Николаев байыаннай сулууспалаахтары кытта көрсүһүү түмүгүнэн кэпсээтэ.

Ил Дархан сэрии инники кирбиитигэр тэриллибит байыастары бэлэмниир кииҥҥэ сырытта уонна байыаннай сулууспалаахтар бэлэмнээхтэрин үрдүк таһымын бэлиэтээтэ.

«Биһиги байыастарбыт кыахтара хас кэлбит аайы улаатан иһэр. Мин 2022-2023 сыллардаахха туох буолбутун өйдүүбүн уонна инники диэки улахан хардыы оҥоһулунна диэн эрэллээхтик этиэхпин сөп. Маннык эрчиллиилэр уотунан уонна тактическай бэлэмнэниигэ биллэ-көстө үөрүйэхтэри ыларга көмөлөһөллөр. Биллэн турар, бу барыта байыаннай сулууспалаахтарбытыгар баар эр санаа, хорсун быһыы курдук хаачыстыбалары кытта дьүөрэлэһэн, биһиги бары туоһу буолар кыайыыларбытын ситиһэргэ кыах биэрэр», — дии саныыр Айсен Николаев. Өрөспүүбүлүкэ салайааччыта биир полигоҥҥа Саха сириттэн сылдьар байыаннай сулууспалаахтар туппут  Арчы Дьиэтигэр сырытта. Манна алгыс сиэрин-туомун толорорго туох баар наадалаах барыта, сахалыы миэбэл уонна иһит-хомуос баар. Саха байыастара бу сиргэ дьиэлэригэр кэлбит курдук сананалларын, билигин сэрии инники кирбиитигэр төрөөбүт дойдуларын кыырпаҕа баар буолбутун кэпсээтилэр. Кинилэр бу эбийиэк дьиҥнээх духуобунай култуура киинэ, алгыс ылар сир буолбутун тоһоҕолоон бэлиэтээтилэр. Ону таһынан, анал байыаннай дьайыы ыытыллар сиригэр сүрүн байыаннай аҕабыыт көмөлөһөөччүтэ, протоиерей Петр Гриценко Айсен Николаевка сыл устата байыаннай чаастары кэрийбит Димитрий Солунскай иконатын туттарда. Инникитин икона Дьокуускайдааҕы Епархияҕа бэриллиэҕэ.