Айсен Николаев бастыҥ ньиэп-гаас хампаанньаларын инновацияларын үрдүктүк сыаналаата

СӨ Ил Дархана Айсен Николаев «Kazan Oil, Gas & Chemistry» норуоттар икки ардыларынааҕы нефтегазохимическэй быыстапкаҕа Арассыыйа уонна тас дойдулар бастыҥ ньиэп-гаас хампаанньаларын саҥа оҥоһуктарын уонна инновационнай быһаарыыларын кытта билистэ, ону тэҥэ бу тэрээһин дойду энергетическэй салаатын сайдыытыгар стратегическай суолталааҕын  бэлиэтээтэ.

«Kazan Oil, Gas & Chemistry» үгэс быһыытынан ньиэп-гаас уонна химия салааларыгар аналлаах тэрили оҥорооччулары уонна хааччыйааччылары, ньиэби-гааһы хостуур уонна таҥастыыр тэрилтэлэри, нефтехимическэй хампаанньалары, ону таһынан ньиэп сервиснэй уонна геолого-чинчийэр тэрилтэлэрин түмэр. Манна саамай бөдөҥ корпорациялар уонна холдиннар бэйэлэрин бастыҥ технологияларын уонна быһаарыыларын көрдөрөллөр. Экспозицияны официальнайдык кэрийии кэмигэр кини «Татнефть», «СИБУР Холдинг», «ТАИФ» хампаанньалар бөлөхтөрүн, «КАМАЗ» уонна «ХимГрад» технополис истиэндэлэригэр сырытта.

«Татарстаан Өрөспүүбүлүкэтин Раиһын Рустам Нургалиевич Миннихановы кытта «Kazan Oil, Gas & Chemistry» норуоттар икки ардыларынааҕы быыстапка экспозицияларын көрдүбүт, онно бастыҥ корпорациялар уонна холдиннар бэйэлэрин саҥа оҥоһуктарын көрдөрөллөр. Биһиги дойдубут үгүс тэрилтэтэ инники диэки хорсуннук хардыылаата – кинилэр оҥоһуктара аан дойду таһымыгар эрэллээхтик күрэстэһэргэ кыах биэрэллэр. Бүгүн нефтегазохимическэй комплекс дириҥ уларыйыыны-тэлэрийиини ааһар. Дойдуга массыына оҥоруутун үүнүүтэ уонна саҥа технологиялар Арассыыйа аан дойду энергетикатын лидердэрин таһымыгар толору кыахтааҕын бигэргэтэллэр», – диэн өрөспүүбүлүкэ Ил Дархана Айсен Николаев бэлиэтээтэ.

«Kazan Oil, Gas & Chemistry» норуоттар икки ардыларынааҕы нефтегазохимическэй быыстапка атырдьах ыйын 26-28 күннэригэр диэри «Казань-Экспо» быыстапка киинигэр Татарстаан Өрөспүүбүлүкэтин Бырабыыталыстыбатын, Татарстаан Өрөспүүбүлүкэтин Бырамыысыланнас уонна атыы-эргиэн министиэристибэтин уонна «Казань Экспо» АОТ өйөбүлүнэн ыытыллар.