Айсен Николаев: «Быйыл ойуур баһаардарынан ЫБМ эрэсиимэ биллэриллибэтэ»

Саха сиригэр быйыл ойуур баһаардарынан ыксаллаах-быһыы майгы  эрэсиимэ биллэриллибэтэ. Бу туһунан Ил Дархан Айсен Николаев «Саха» НКИХ ханаалга «Ил Дарханныын кэпсэтии» биэриигэ иһитиннэрдэ.

Кини быйылгы туругу халлаан усулуобуйатыгар уонна эрдэттэн ыытыллыбыт күүстээх бэлэмнэнии үлэтигэр сибээстээтэ. Өрөспүүбүлүкэ баһылыга эппитинэн, былырыыҥҥыга тэҥнээтэххэ, ойуур баһаарын ахсаана үс төгүл, оттон умайбыт иэнэ 21 төгүл аҕыйаабыт.

«Быйыл ойуур баһаарыттан Саха сиригэр ыксаллаах быһыы-майгы эрэсиимин биллэрбэтибит. Бу халлаан туругуттан ураты, урукку сылларга ыытыллыбыт улахан бэлэмнэнии үлэтин, күүспүт-кыахпыт эбиллибитин түмүгэ», — диэн Айсен Николаев бэлиэтээтэ. Ил Дархан былырыын дойду Бэрэсидьиэнигэр ойуур баһаардарын утары үлэҕэ үбүлээһини эрдэттэн көрөр туһунан этиитин киллэрбитин уонна өйөммүтүн санатта. Ол түмүгэр үп-харчы эрдэттэн тыырыллан, быйылгы үлэҕэ улахан көмөнөн буолла.