Айсен Николаев Былатыан Ойуунускай пааматынньыгар сибэкки дьөрбөтүн уурда

Бүгүн, балаҕан ыйын 27 күнүгэр, Судаарыстыбаннас күнүгэр Дьокуускайга биллэр судаарыстыбаннай диэйэтэл, суруйааччы, өрөспүүбүлүкэ автономиятын төрүттээччилэртэн биирдэстэрэ Платон Алексеевич Ойуунускай пааматынньыгар Ил Дархан Айсен Сергеевич Николаев уонна өрөспүүбүлүкэ уопсастыбаннаһа сибэкки дьөрбөтүн уурдулар.

«Бу — дойду уонна Саха сирин кэскилигэр эппиэтинэһи санатар, сомоҕолоһуу уонна элбэх нациялаах норуот бииргэ буолуутун бырааһынньыга. Былатыан Ойуунускай, Максим Аммосов, Исидор Барахов, Степан Аржаков уонна биллэр-көстөр уопсастыбаннай, бэлитиичэскэй диэйэтэллэр үтүөлэринэн үйэ кэриҥэ анараа өттүгэр өрөспүүбүлүкэбит судаарыстыба иһигэр сылдьан автономнай ааты ылбыта, бу эрэгийиэммит экэнэмиичэскэй, научнай, промышленнай уонна духовнай сайдыытыгар төһүү күүһү уурбута», — диэн Ил Дархан Айсен Николаев тыл эттэ.