Айсен Николаев Бүлүүгэ тэриллибит ыччат бибилэтиэкэтин үрдүктүк сыаналаата

Ил Дархан Айсен Николаевка Бүлүү улууһунааҕы модельнай киин бибилэтиэкэ баазатыгар аһыллыбыт ыччат бибилэтиэкэтин көрдөрдүлэр. Күн бүгүн бу бибилэтиэкэ куорат саамай креативнай былаһааккатынан буолар.

Улуус баһылыгын көҕүлээһининэн уонна өйөбүлүнэн 2021 уонна 2022 сылларга модельнай киин бибилэтиэкэ, улуустааҕы оҕо бибилэтиэкэтэ уонна ыччат бибилэтиэкэтин саҥа эбийиэктэрэ аһыллыбыттара.

Улуустааҕы бибилэтиэкэ ситимин дириэктэрэ Николай Харлампьев иһитиннэрбитинэн, манна ыччат киэһэ да, сарсыарда даҕаны сылдьар эбит. Айсен Николаев дьарыктанарга уонна сэһэргэһэргэ аналлаах хостор дизайннарын уонна таҥыллыытын биһирээтэ, ыччат бибилэтиэкэтин үрдүктүк сыаналаата.

“Ыччат аахпат диииллэрэ – сыыһа өйдөбүл. Ыччат ааҕар, кинилэри сэҥээрдэр инниттэн саҥа ньымалары көрдүөхтээхпит. Олортон биирдэстэринэн бу курдук уопсастыбаннай сир”, — диэн Айсен Николаев бэлиэтиир.

Бибилэтиэкэ үлэһиттэрэ өрөспүүбүлүкэ салалтата бибилэтиэкэлэргэ болҕомтотун уонна өйөбүлүн иһин  махталларын биллэрдилэр.

Култуура уонна духуобунай сайдыы министиэристибэтэ итиэннэ өрөспүүбүлүкэтээҕи Национальнай бибилэтиэкэ улуус бибилэтиэкэлэрин сайыннарыыга киэҥ хабааннаах үлэни ыыталлар. Кинигэ пуондатын саҥардаллар, бибилэтиэкэ дьиэлэрин туталлар, өрөмүөннүүллэр.

Бүлүү улууһунааҕы И.М.Гоголев — Кындыл аатынан бибилэтиэкэлэр ситимнэрин дириэктэрэ Николай Харлампьев ааспыт сыл бүтүүтэ кинилэр модельнай бибилэтиэкэ аата иҥэриллэр өрөспүүбүлүкэтээҕи улахан куонкуруска кыайбыттарын уонна материальнай-тэхэньиичэскэй баазаларын хаҥатыыга 1 мөл. 300 тыһ. солк. ылбыттарын иһитиннэрдэ. Бу үбүнэн саҥа тэрили атыылаһыахтара, ону тэҥэ, аныгы олох ирдэбилинэн бибилэтиэкэ иһинэн медиа киини арыйыахтара.

Бүлүүтээҕи норуот бибилэтиэкэтэ, билиҥҥинэн Бүлүүтээҕи бөһүөлэктэр икки ардыларынааҕы бибилэтиэкэ ситимэ 1898 сыллаахха тэриллибитэ. Үлэ сылыгар Бүлүүтээҕи босхо бибилэтиэкэ бастакы уопсастыбаннай бибилэтиэкэрэ, сахалартан Үлэ бастакы Дьоруойа Петр Хрисанфович Староватов төрөөбүтэ 150 уонна Бүлүүтээҕи норуот бибилэтиэкэтэ тэриллибитэ 125 сыллара бэлиэтэнэрэ суолталаах.

СӨ Ил Дарханын уонна Бырабыыталыстыбатын пресс-сулууспата.