Ил Дархан Айсен Николаев бүгүн, олунньу 24 күнүгэр, Бүлүүгэ улуус социальнай-экэнэмиичэскэй сайдыытын боппуруостарынан сүбэ-мунньаҕы ыытта.
Сирэй көрсөн олорон уонна тэйиччиттэн киэбинэн ыытыллыбыт мунньахха үрдүкү салалта салайааччылара, Бүлүү улууһун уонна куоратын дьаһалтатыттан кыттыыны ыллылар.
Ил Дархан Бүлүү улууһа кэнники сылларга социальнай-экэнэмиичэскэй сайдыыта тэтимнээҕин, нэһилиэнньэ ахсаан өртүнэн эбиллибитин бэлиэтээтэ. Айсен Николаев Бүлүү улууһун салалтатыгар уонна олохтоохторугар байыаннай сулууспалаахтары уонна кинилэр дьиэ кэргэттэрин өйүүр үлэҕэ тиһиктээхтик ылсыбыттарыгар махтанна.
Аҕа баһылык доруобуйа харыстабылын бастакы сүһүөх звенотун саҥатытыы иитинэн оройуоҥҥа улахан үлэ ыытыллыбытын бэлиэтээтэ. Манна даҕатан эттэххэ, Бүлүүгэ өр күүппүт эбийиэктэрэ, оройуоннааҕы киин балыыһа комплексын бастакы уочарата аһыллыахтаах.
«Комплексы тутуу үлэтэ салҕанар. Биэлсэр-акушер пууннарын тутуу үлэтэ ыытыллар. Доруобуйа харыстабылыгар көлө ылар былаан баар», — диэн эттэ уонна бырабыыталыстыбаҕа доруобуйа харыстабылын тэрилтэлэрин каадырдарынан хааччыйыы, нэһилиэнньэҕэ искэннээхтэргэ уонна харахтарынан кыһалҕалаахтарга көмөнү оҥорууну кэҥэтии боппуруоһун хонтуруолга туталларыгар соруйда.
Ил Дархан улуус күөх төлөнү киллэриигэ, бөһүөлэктэр икки ардыларыгар гаас ситимин тутууга кыттыгас үбүлээһиҥҥэ бастакынан буолалларын этэн туран, бу өрөспүүбүлүкэ атын улуустарыгар үтүө холобур буоларын ыйда. Итинник үлэ ыытыллар буолан, сыл бүтүөр диэри бөһүөлэктэр икки ардыларыгар «Хампа-Эбэ» гаас ситимэ тардыллан бүтүөхтээҕин уонна бөһүөлэк иһигэр ситимҥэ үлэ саҕаланыахтааҕын иһитиннэрдэ.
Кини өссө биир боппуруоска тохтоото. Ол олохтоохтор эмиэ долгуйар, уоту-күөһү сайыннарыы боппуруоһа буолар.
«Салгыы сайыннарыыны биһиги Сунтаар-Ньурба уот ситимин линиятын тутууну кытары ситимниибит. Манна болдьох барыта тутуһуллуохтаах. Бүлүү улууһугар барытыгар уотунан-күөһүнэн хааччыйыы хаачыстыбата үрдүк уонна эрэллээх буоларыгар 24 МгВт күүстээх газопоршневай уот ыстаансыйатын тутуу быһаарыа. Бу наадалаах эбийиэк чугастааҕы сылларга баар буоларыгар эрэнэбин», — диэтэ кини.
Бу күн Бүлүүгэ 990 миэстэлээх осуоланы тутуу бырайыагын дьүүллэстилэр. Оройуоҥҥа 2024 уонна 2025 сылларга улууска уонна өрөспүүбүлүкэҕэ суолталаах үбүлүөйдээх дааталар бэлиэтэнэллэр. Улуус баһылыга Сергей Винокуров САССР уһулуччулаах судаарыстыбаннай диэйэтэлэ Гаврил Иосифович Чиряев төрөөбүтэ 100, САССР төрүттэспит дьоннортон биирдэстэрэ, уһулуччулаах судаарыстыбаннай диэйэтэл Степан Максимович Аржаков төрөөбүтэ 125 уонна Бүлүү куорат 390 сылларынан өрөспүүбүлүкэ суолталаах тэрийэр кэмитиэти тэрийэргэ Ил Дархантан көрдөстө.
Маныаха Айсен Николаев өрөспүүбүлүкэ суолталаах тэрийэр кэмитиэт туһунан этиини өйөөтө. «Степан Аржаков уонна Гаврил Чиряев өрөспүүбүлүкэ сайдыытыгар сүҥкэн кылаат ытык дьоммутунан буолаллар. Үбүлүөйдээх бэлиэ сылларга бэлэмнэниини билиҥҥиттэн саҕалыыр наада. Бу Бүлүү төрүттэммитэ 390 сылыгар эмиэ сыһыаннаах. Бырабыыталыстыба туспа быһаарыы ылыа», — диэтэ.
Сүбэ мунньахха Ил Дархан нэһилиэктэргэ уонна оройуоҥҥа национальнай бырайыактарынан тэрээһиннэр туолууларын кытаанах хонтуруолга ылар наадатын бэлиэтээтэ.
Улахан болҕомто гражданнары хаарбах туруктаах дьиэттэн көһөрүү бырагырааматыгар ууруллар. «Дьиэлэр хаачыстыбалаахтык уонна болдьоммут кэмнэригэр тутуллуохтаахтар. Дьон көспүт дьиэтэ, баһаар тахсар биричиинэтинэн уонна бэрээдэги кэһии таһымын үрдэтэр сиринэн буолуо суохтаахтар, онон уталыппакка кэмигэр көтүрэн, ыраастаан иһэр наада», — диэтэ Айсен Николаев.
СӨ Ил Дарханын уонна Бырабыыталыстыбатын пресс-сулууспата
Андрей Сорокин хаартыскаҕа түһэриитэ. СИА
Сообщить об опечатке
Текст, который будет отправлен нашим редакторам: