Айсен Николаев Бырабыыталыстыба салалтатын кытта мунньахтаата

Ил Дархан Айсен Николаев бүгүн, олунньу 26 күнүгэр, СӨ Баһылыгын уонна Бырабыыталыстыбатын дьаһалтатын салалтатын кытта мунньахтаата.

Манна кини Сэбиэскэй Сойуус Дьоруойа Федор Матвеевич Охлопков кэриэһигэр анаммыт ытыыга Арассыыйатааҕы турнир үрдүк таһымнаахтык ыытыллыбытын бэлиэтээтэ. Ил Дархан бэйэтин уонна РФ Бырабыыталыстыбатын бэрэссэдээтэлин солбуйааччы — Уһук Илиҥҥэ РФ Бэрэсидьиэнин боломуочуйалаах бэрэстэбиитэлэ Юрий Трутнев аатыттан турнир тэрийээччилэригэр махтанна.

«Аныгыс турниры бу күһүн ыытары былаанныыбыт», — диэтэ Айсен Николаев.

Итиэннэ мунньахха бүддьүөт кирэдьиитин реструктуризациялааһын мэхэньиисимин, технопааркалары сайыннарыы, үөрэх хаачыстыбатын сыаналааһын туһунан кэпсэттилэр.