Айсен Николаев Дмитрий Коркин турнирын иннинэ Саха сирин көҥүл тустууга хамаандатыгар экипировканы туттарда

СӨ Ил Дархана, өрөспүүбүлүкэтээҕи тустууга Федерациятын бэрэсидьиэнэ Айсен Николаев, сэтинньи 14 күнүгэр, САССР, РСФСР уонна ССРС үтүөлээх тириэньэрэ Дмитрий Коркин аатынан норуоттар икки ардыларынааҕы көҥүл тустуу күрэхтэһиитигэр кыттар өрөспүүбүлүкэ хамаандатын чилиэннэрин кытта көрүстэ уонна спортивнай экипировканы туттарда.

«Бастатан туран, эһиэхэ сөбүлүүр дьыалаҕытыгар бэриниигит, тулууругут, көбүөргэ көрдөрөр кэрэ көстүүлээх кыайыыгыт уонна тохтообокко дьулуһуугут иһин махтанабын. Эһиги араас таһымнаах күрэхтэһиилэргэ биһиги өрөспүүбүлүкэбитин албан ааттыыгыт, эдэр көлүөнэни успуорка ситиһиилэргэ уһугуннараҕыт уонна тулуур, өй-санаа күүһэ холобурдарын көрдөрөҕүт», – диэн Айсен Николаев этиитинэн, турнирга кыайыыны баҕарда.

Икки төгүллээх Аан дойду чөмпүйүөнэ, норуот дьокутаата, «Саханефтегазсбыт» АО генеральнай дириэктэрэ Виктор Лебедев, Дмитрий Коркин аатынан көҥүл тустуу турнира  Арассыыйаҕа саамай бөдөҥ успуорка тэрээһиннэр ахсааннарыгар киирэрин бэлиэтээтэ. Быйылгы күрэхтэһиигэ Саха сириттэн 107 бастыҥ тустуук кыттыахтаах.

«Бүгүҥҥү туругунан 11 хамаанда кэллэ, онно киирсэллэр Япония уонна Куба хамаандалара. РФ эрэгийиэннэриттэн уонна атын дойдуттан 200-тэн тахса күрэсчит кыттыаҕа диэн кэтэһэбит. Бастакы миэстэлэр иһин бириис – 200 тыһыынча солкуобай, иккис миэстэҕэ – 100 тыһыынча солкуобай, үһүс миэстэҕэ – 75 тыһыынча солкуобай. Ону тэҥинэн, кыайыылаахтар тириэньэрдэригэр эмиэ өйөбүл оҥоһуллуоҕа – 50 тыһыынча солкуобай. Махтал, Айсен Сергеевич, эһиэхэ, Саха сирин тустуу федерациятын бэрэсидьиэнин быһыытынан көмөҕүт иһин», – диэн Виктор Лебедев эттэ.

Спортивнай экипировканы хамаанда чилиэннэрэ  РФ успуорка маастара, 2025 сыллааҕы Арассыыйа чөмпүйэнээтин боруонса призера Константин Капрынов, Арассыыйатааҕы успуорка маастара, Арассыыйа первенствотын уонна чөмпүйэнээтин кыайыылааҕа уонна призера, Европа первенствотын икки төгүллээх кыайыылааҕа, аан дойду первенствотын үрүҥ көмүс призера Лев Павлов, РФ успуорка маастара, 2021 сыллааҕы Иван Ярыгин аатынан Гран-при турнирын боруонса призера Ньургун Сергин уонна РФ успуорка маастара, 21 саастаахтар первенстволарын кыайыылааҕа, 2024 сыллааҕы Европа первенствотын 21 саастаахтарга кыайыылааҕа Андрей Мидловец.

Саха сирин көҥүл тустуу хамаандатын хапытаана, Арассыыйатааҕы успуорка маастара Константин Капрынов, кэрэни кэрэхситэр тустуу күүтүллэрин, Саха сирин тустууктар хамаандата көбүөрдэргэ кыайыыны ситиһэллэригэр эрэннэрдэ.