Айсен Николаев Дьокуускай төрөөбүт күнүнэн эҕэрдэлиир

Өрөспүүбүлүкэ баһылыга Айсен Николаев Дьокуускай куорат төрүттэммитэ 391 сылынан эҕэрдэлиир.

«Ытыктабыллаах Саха сирин олохтоохторо! Саха Өрөспүүбүлүкэтин салалтатын уонна тус бэйэм ааппыттан Дьокуускай куорат төрөөбүт күнүнэн ис сүрэхпиттэн эҕэрдэлиибин!

Биһиги Дьокуускайбытын хас даҕаны көлүөнэ сыралаах үлэлэринэн оҥорбуттара. Сыллата биһиги тапталлаах куораппыт сайда, тупса турар.

Дьокуускай төрөөбүт күнүн саҥа ситиһиилэрдээх көрсөр. Куоракка биэс сыл иһигэр 40 бөдөҥ социальнай инфраструктура эбийиэгэ тутулунна. Уһук Илиҥҥэ бастакынан креативнай кластеры, Кардиологическай киини арыйдыбыт. Билигин Онкологическай киин уонна эпос, култуура Арктикатааҕы киинэ тутуллан бүтэн эрэллэр. 2024 сылга «Азия оҕолоро» спортивнай оонньуулары ыытыахпыт, онно анаан каток уонна успуорт саалата тутуллар.

Дьокуускай төрүттэммит 1632 сылыттан Арассыыйа судаарыстыбатын кытта ыкса ситимнээх устуоруйалаах. Ленскэй остуруок нуучча айанньыттара тохтуур сирдэриттэн саҕалаан научнай эспэдииссийэлэр тэриллэр сирдэринэн буолбута. Билигин Уһук Илин биир аныгы киининэн буолла.

2022 сыл сэтинньитигэр РФ Бэрэсидьиэнэ Владимир Путин быһаарыытынан, Дьокуускай «Килбиэннээх үлэ куоратынан» үрдүктүк ааттаммыта. Бу Аҕа дойду Улуу сэритиин кэмигэр үлэлээбит олохтоохтор хорсун быһыыларын билиниинэн ааҕыллар.

Дьокуускай маастар-былаанын тутуһан сайдар, тупсар. Саҥа уопсастыбаннай кэрэ сирдэр, тупсаҕай көстүүлээх тиэргэннэр, болуоссаттар тутуллаллар.

Биһиги бары Дьокуускайы аан дойду үрдүнэн ирбэт тоҥҥо турар бастыҥ куорат оҥорорго дьулуһуохпут.

Куорат олохтоохторун куорат туһугар кыһаллалларыгар махтанабыт. Эйэни, дьолу, этэҥҥэ буолууну, ситиһиилэри, доруобуйаны баҕарабын.

Бырааһынньыгынан, төрөөбүт күҥҥүнэн, тапталлаах Дьокуускайбыт!