Айсен Николаев: «Доруобуйа харыстабылын уонна үөрэхтээһин эбийиэктэрин тутууну түргэтэтэргэ»

Бүгүн, муус устар 29 күнүгэр, Ил Дархан Айсен Николаев национальнай бырайыактарынан тутуллар эбийиэктэри олоххо киллэриигэ туһаайыллыбыт боппуруостары суһал ыстаап уочараттаах мунньаҕар ырытта.

Мунньахха доруобуйа харыстабылын, үөрэхтээһин, култуура бөдөҥ эбийиэктэрин тутан олоххо киллэрии боппуруостарын дьүүллэстилэр. Ол курдук, Уус Маайа улууһун Уус Маайа бөһүөлэгэр, Муома улууһугар Хонууга  балыыһалаах,  поликлиникалаах комплекстар тутуллууларын хаамыытын, Дьокуускайдааҕы онкологическай диспансер, Нам улууһугар Остуолбаҕа култуура уонна спорт киинин, Дьокуускай куорат Пирогов уулуссатыгар доруобуйаларыгар хааччахтаах оҕолорго анаммыт 4 №-дээх коррекционнай уонна Жатайга 360 миэстэлээх  оскуолалары тутуу боппуруостарын дьүүллэстилэр.

Хас биирдии эбийиэккэ сыһыаннаан, тутуу болдьохторугар  уонна үбүлээһиҥҥэ кэккэ сорудаҕы биэрдэ. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрдэ.