Айсен Николаев экология миниистирэ Александр Козловы кытта көрүстэ

Ил Дархан Айсен Николаев Москваҕа Арассыыйатааҕы айылҕа ресурсаларын, экология миниистирэ Александр Козловы кытта көрүстэ. Кинилэр бу сайыҥҥы баһаардар, геологоразведочнай үлэлэр бырагыраамаларын, о.д.а. боппуруостары быһаарыстылар.

Айсен Николаев эппитинэн, быйылгы дьылга күн-дьыл 2021 сыл сайынын батыста. Кураан күн-дьыл туран, баһаар барарыгар сэрэхтээх кэмнэр этилэр. Ол эрээри, эрдэттэн үлэ-хамнас ыытыллыбыт буолан, быйыл баһаар ахсаана аҕыйах.

Ойуур баһаарын бохсууга тустаах сулууспалар суһаллык үлэлээбиттэрэ, харыстанар сирдэр иэннэрин кэҥэтии, баһаар үөскүүр төрүөттэрин утары үлэ ситиһиилээх буолла.
Быйыл сайын Саха сирэ бэйэтэ ылыммыт,  ардаҕы аҕалар зондировщик сөмөлүөтэ үлэлээбитэ. Ол улахан баһаар тарҕанарын бохсорго көдьүүстээх буолла.

Ил Дархан, бырабыыталыстыба дьаһалтатын пресс-сулууспата.